Convocada la tercer edición del concursu pa Secundaria y Bachilleratu sobre Derechos Humanos

Los trabayos pa esti gallardón lliterariu qu'entama l'Axencia Asturiana de Cooperación al Desarrollu pueden presentase n'asturianu, gallego-asturiano y castellanu.

El concursu sobre Derechos Humanos algama la so tercer edición "cola mira de fomentar nos y nes estudiantes d’Educación Secundaria Obligatoria y Bachilleratu los valores de solidaridá, respetu y xusticia social, motivar la creatividá de la mocedá, amás de llograr un acercamientu y conocimientu mayor de la vulneración de los Derechos Humanos nel mundu, pa que puean exercer un rol activu como axentes constructores d’una sociedá asturiana cada vez más solidaria y inclusiva". Yá ta convocada la del 2023 y les alumnes y alumnos tienen hasta'l 15 de payares pa presentar les sos obres.

Éstes han tar rellacionaes col conteníu de la Declaración Universal de los Derechos Humanos aprobada nel 1948 pola Asamblea Xeneral de les Naciones Xuníes. Cada centru educativu va poder llevar énte'l xuráu un máximu de 3 per cada aula perteneciente a caún de los ciclos educativos nes trés categoríes esistentes: l'A, pa microrrellatos en primeru y segundu de Secundaria; la B, pa microrrellatos en terceru y cuartu; y la C, pa rellatos en Bachilleratu.

El ganador va llevar una cámara instantánea, valorada en 180 euros, y un llote de llibros, mentes que'l segundu clasificáu y el terceru van recibir, amás d'exemplares, máquines tasaes en 130 y 90 euros, de manera respeutiva. Los centros de los vencedores tamién van disfrutar d'un llote de llibros.