Álvarez Peña abre la temporada de charres sobre cultura asturiana de l'asociación Ástura

L'etnógrafu va poner la intervención 'Etnoarqueoloxía y cuentu tradicional asturianu' nel Atenéu Obreru de Xixón.

Cola llegada d'ochobre, depués del parón de branu, tornen les conferencies sobre cultura asturiana d'Ástura. El segundu martes de cada mes esta asociación convoca a la sociedá na segunda planta de la Escuela de Comerciu pa tratar un tema siempre interesante de la mano d'un espertu.

Nesta ocasión el convidáu ye Alberto Álvarez Peña, etnógrafu, escritor y dibuxante espertu en mitoloxía y tradición oral. Na conferencia prevista pa mañana a les 19 hores "va tratar d'esplicar que los cuentos tradicionales, que se tresmiten de xeneración en xeneración, nun son una invención ensin más pa distrayer a los nenos, sinón una construcción d'una sociedá determinada, que munches vegaes funde los sos raigaños en quinientos o mil años d'antigüedá o una creación pa tresmitir la memoria cultural y los fechos históricos qu'una determinada comunidá entiende como inolvidables", espliquen dende Ástura.

Asina, añaden que "esiste una catalogación universal de cuentos, que se llama Aarne-Thompson-Uther (Aarne ye finés, Thompson americanu y Uther alemán), que catalogaron los cuentos en 1910, 1928 y 2004 respeutivamente, y qu'esplica cómo un mesmu cuentu clasificáu con un determináu númberu apaez en países tan alloñaos como Estonia, Irlanda o Asturies…". "Pero, ¿por qué falamos d'etnoarqueoloxía? Porque en delles d'estes narraciones, non en toes, quedaron fosilizaos determinaos tipos de práutiques o d'acontecimientos que l'arqueoloxía vieno demostrar como verdaderos", respuenden al tiempu que rescamplen que "les investigaciones antropolóxiques y etnográfiques atestigüen que los cuentos funcionen como una ferramienta de caltenimientu de la memoria coleutiva y de llucha escontra l'escaezu al caltener afitaes les alcordances y les esperiencies de los grupos humanos".