El Ministeriu de Cultura concede a Rodrigo Cuevas el Premio Nacional de las Músicas Actuales

Serrat, Amaral, Kiko Veneno, Luz Casal y Rozalén son dalgunos de los artistes o bandes que recibieron esti reconocimientu.

El xuráu del Premio Nacional de las Músicas Actuales del 2023 decidió conoceder el gallardón a Rodrigo Cuevas, primer músicu nacíu n'Asturies en recibilu. Ésti tuvo presidíu pol direutor xeneral del Instituto Nacional de las Artes Escénicas y de la Música (INAEM), Joan Francesc Marco, con Ana Faus, subdireutora xeneral de Música y Danza, como vicepresidenta,y tuvo compuestu por Manuel Ferrand, xestor cultural, críticu musical y direutor del Festival de Música Española de Cádiz; Tomás Fernando Flores, direutor de Radio 3; la xestora cultural Almudena Heredero; Montserrat Portús, direutora del Mercat de Música Viva de Vic; Diego Rodriguez de Juan (Diego RJ), direutor y presentador del programa 'El sótano' de Radio 3; y Carmen Zapata, a propuesta de l'Asociación de Mujeres de la Industria de la Música.

Reconocen al uvieín residente en Piloña, que ta acabante d'asoleyar el so tercer discu, 'Manual de romería', "pola singularidá de la so obra con una propuesta trescendente que xune música tradicional folclórica y música popular contemporánea" y valoren que'l "so proyeutu artísticu aporta un fuerte compromisu pola diversidá". D'igual forma, rescamplen "la intensidá de la so música en direuto y l'imaxinariu fuertemente personal".

Na presentación del so currículu apunta que l'espectáculu actual de Cuevas "nútrese de les cantares del álbum –en referencia a Manueal de romería'–, nel que fai usu del asturianu y del español como llingües vehiculares".

30.000 euros de dotación

El Ministeriu de Cultura y Deporte entrega esti premiu que tien una dotación de 30.000 euros. Enantes lu llevaren Joan Manuel Serrat (2009), Amaral (2010), Santiago Auserón (2011), Kiko Veneno (2012), Luz Casal (2013), Carmen París (2014), Jorge Pardo (2015), Martirio (2016), Javier Ruibal (2017), Christina Rosenvinge (2018), Mala Rodríguez (2019), Chano Domínguez (2020), Rozalén (2021) y Sílvia Pérez Cruz (2022).