Los Talleres de Llectura n'Asturianu de la Comarca de la Sidra proponen cinco obres

Los títulos pueden solicitase n'empréstamu al Serviciu de Normalización Llingüística.

Nava y Villaviciosa, les dos poblaciones qu'acueyen los Talleres de Llectura n'Asturianu de la Comarca de la Sidra, van entamar nel trimestre últimu del añu seis alcuentros con autores de los cinco títulos que se proponen pa esta seronda. El primeru va tener llugar mañana a les 19 hores na sala Marta Portal de la Casa Cultura de Nava, cita na que va tar presente Ruma Barbero pa falar del so cómic 'Seltegu', XI Premiu Alfonso Iglesias de cómic, correspondiente al 2019, dibuxante que va repetir en Villaviciosa, na Casa de los Hevia, el 25 d'ochobre.

Tamién va tar a disposición de los llectores 'No que cinca a los seres de lleenda', de Blanca Fernández, que va visitar Nava'l 18 d'ochobre; 'Fortuna', de Milio Rodríguez Cueto, con alcuentru previstu pal 15 de payares tamién en Nava; 'El viaxe del cacique', de Gonzalo G. Barreñada, convidáu pal 22 de payares en Villaviciosa; y 'Ana María. La llobera d'Asturies', de Guillermo Menéndez Quirós, que va pesllar esti trimestre'l 13 d'avientu nel Atenéu Obreru. Toles cites son a les 19 hores, con entrada llibre.

El Serviciu de Normalización Llingüística pon a disposición de les persones que quieran participar estos títulos n'empréstamu. La xente interesao pue contautar al traviés del corréu electrónicu normastur@lacomarcadelasidra.com, el so perfil na rede social Facebook o'l teléfonu 985.71.84.13.