"La llingua asturiana arriquez; ye cultura siempre y ye la nuestra", defende la conseyera d'Educación

Lydia Espina retrucó asina na Comisión de la Xunta Xeneral a Javier Jové, diputáu de VOX, que la calificara de "funcionalmente inútil".

Foi nel momentu de falar de los alumnos con necesidaes especiales cuando sacó'l tema llingüísticu, citando la inestencia de ratio mínimu pa poner clase de la materia de Llingua Asturiana y Lliteratura y obviando que ye por mandáu del Tribunal Supremu pola necesidá de cumplir cola Llei d'Usu y Promoción del Bable/Asturianu. "La llingua asturiana represéntanos a toos y a toes y si a vusté nun-y gusta pue nun falala. Yo respétolu porque tengo llibertá pa facelo y vusté nun sé si la tien, pero debería facelo. Respete vusté la llibertá de los asturianos y asturianes que queremos comunicanos con esa llingua", respondió Espina en tonu seriu.

"Ta comparando una cosa cola otra. La nuesa propia norma curricular fala de la llingua asturiana como un derechu de los alumnos y alumnes y afita les hores a tener esta ufierta educativa. La llingua asturiana represéntanos y voi defendela siempre, como llevo faciendo dende que soi pequeña. Voi facelo siempre porque arriquez. Yo soi profesora d'Inglés y la diversidá d'una llingua ye favoratible siempre, ye cultura siempre y ésta ye la nuestra. Pue considerala como quiera, pero dende llueu nun ye inútil cuando la falen les nueses families, cuando la falo yo mesma nel contestu que me paez y m'apetez. Llibertá ye respetar", siguió.

Depués la conseyera apuntó que "Llingua Asturiana y Cultura Asturiana son optatives del currículu, qu'entrambes amás tán mui bien, tienen un currículu mui afayadizu y a los neños y neñes de Primaria-yos encanta les dos" y recordó que "Llingua Asturiana ye la mayoritaria" nesa etapa. "¿Significa que porque atendamos a la llingua asturiana nun atendemos a la diversidá? Esto ye como si vusté me diz que porque tenemos programes 'Hable' de llingües estranxeros nun atendemos a la diversidá. El sistema d'educación asturianu tien que ser suficientemente ampliu pa dar respuesta a too, y el plurillingüismu ye fundamental. Si una persona adquier la llingua asturiana con rigor, como a min me gustara de pequeñina, y nun tuvi esa suerte, munchísimo meyor, porque va adquirir la segunda, tercera y cuarta llingua rápido. Poro, vamos a respetar, porque la llingua asturiana nun molesta a naide nes escueles, al revés, refuercia y ayuda".