La cultura asturiana festéxase estos díes en Degaña, Cabranes, Bimenes y Grau

El CachuFest, el Trasiegu Fest y el VII Día'l Traxe'l País ponen en valor les nueses tradiciones.

Esta fin de selmana va tar cargada d'actividaes venceyaes cola cultura asturiana. Cuatro conceyos, toos fuera del área central, entamen eventos estos díes nos que la música, la gastronomía, la sidra o los paxellos tradiciones son protagonistes.

En Trabáu organízase'l CachuFest, con conciertos, visitas guiaes, una sesión de cine de temática sobre la despoblación, amueses de cocina y actividaes infantiles ente güei y el domingu. Los habitantes y visitantes d'esti llugar de Degaña van poder disfrutar esta nueche de les actuaciones de 6 Riales y Alienda (22.30 hores) y mañana de Guieldu y Eva Tejedor & Les Pandereteres (22.30 hores), mentes que Llevólu'l Sumiciu va tar presente'l domingu n'Ibias, nel pueblu de Vilardecencias.

El Trasiegu Fest arrancó'l llunes con actividaes tamién en Colunga y Sariegu. Güei y mañana Cabranes, en concreto Santolaya, va acoyer un mercáu tradicional y gastronómicu, y conciertos, ente otros eventos.

Asina, esta nueche va celebase una 'Nueche en Mayanza' col Grupo Folklórico Trebeyu y mañana van tocar Luis Núñez y los Folganzanes (18.30 hores), Algaire (20.30 hores), La Tarrancha (22.30 hores) y Llevólu’l Sumiciu (00.30 hores). El domingu l'actividá treslládase a Bimenes, con música pa neñes y neños pela mañana en Santuyano al meudía con Mestura y, dende les 13 hores, con David Varela, que va dar un conciertu didácticu familiar, y una mesa redonda y una tastia de sidra de gala pela tarde en Martimporra.

Concursu 'Indumentaria'

Grau vive la mañana del domingu'l VII Día'l Traxe'l País, xornada pa reivindicar el nuesu paxellu tradicional que tien el so actu central nel concursu 'Indumentaria'. Va celebrase a les 13 hores na plaza Los Dolores y el desfile va tar acompañáu pola música d'Octavio Trapiella y Dolfo Fernández, y va contar cola collaboración d'Isaac Sierra Longo.

"'Indumentaria nun ye un certame de guapura física, ye un concursu onde se va valorar que les persones se vistan con xeitu y fachenda según les fontes documentales que se conocen, reproduciendo la manera de vistir de los asturianos de mediaos del sieglu XIX. Cada persona proyecta la so manera de ser na ropa que viste: esa ye la riqueza", esplica la organización.

Esta xornada complétase con Menudu Traxín, xuegos infantiles con Prau Llerón frente a la Casa Conceyu de 11 a 12.30 hores, y con baille asturianu dende les 17.30 na Plaza'l Mercáu con pandereta, gaita y tambor, y la participación de Leticia Baselgas, Balbo Menéndez y Arsenio Ruiz, Ana Díez, Roge Feito y Clarita Braña, Santi Galguera, Pedro Pangua y Pepe Vega, y Ramsés Ilesies y Xosé Antón Fernández 'Ambás'.