El piloñesu Cardín presenta en Bimenes el so llibru 'A perda do uso de idiomas ibéricos'

La obra céntrase nel usu del gallegu y del castellanu en Galicia, onde vive l'autor, pero tamién dedica espaciu a les llingües más amenazaes, como l'asturianu.

Ánxel Cardín desplázase a Martimporra pa presentar el so llibru 'A perda do uso de idiomas ibéricos. Caso especial do galego. E as dúas primeras enquisas sobre o uso do galego'. Nacíu en L'Infiestu nel 1942, lleva cuasi tola so vida profesional en Galicia exerciendo como economista y sociólogu, y collaborando en temes demográficos y económicos cola 'Gran Enciclopedia Galega'.

Hai unos diez años yá espublizara 'El azabache y su cultura en la Península ibérica', llibru de referencia nel tema que resume les sos investigaciones sobre esti mineral con gran presencia n’Asturies y na so cultura tradicional y mui venceyáu al Camín de Santiagu. Na obra qu'agora presenta, asoleyada nel 2021 pola editorial Cromogal, ufre los datos algamaos nel 1970, per primer vegada de manera científica, sobre l’usu del gallegu y del castellanu en Galicia.

Tamién básase nel so trabayu sociollingüísticu fechu na zona de Vigo, nel 1973, pa conocer dalgunos de los problemes del usu de la llingua llariega en competencia cola castellana. El llibru complétase con una mirada a la situación de les llingües penínsulares más amenazaes, esto ye, vascu, aragonés, aranés, mirandés y asturianu, y los problemes pa la so normalización, repasando cómo foi la decadencia del so usu y la situación pela que pasen anguaño.

La presentación de 'A perda do uso de idiomas ibéricos' va tener llugar mañana a les 19 hores nel Salón de Plenos de la Casa Conceyu de Bimenes. Cardín enfotóse en facer esti actu nel conceyu yerbatu pola importancia que tien ésti na defensa de la llingua asturiana.