Iniciativa pol Asturianu considera “una discriminación” que los diputaos qu’usen l’idioma tengan que dividir el tiempu d’intervención p'autotraducise

El tener que repetir la so intervención en llingua asturiana en castellanu, perdiendo tiempu d’intervención y limitando la so actividá parllamentaria, ye pa Iniciativa pol Asturianu “una discriminación” pa les diputaes y diputaos qu'empleguen l'idioma nel Congresu. La organización insiste en “que la única ferramienta que va poder garantizar la plena igualdá ente tola ciudadanía independientemente de la llingua qu’use ye la oficialidá”.

Nun comunicáu asoleyáu esta mañana indica que valora “la decisión de la Mesa del Congresu pa permitir l’usu del asturianu y l’aragonés na Cámara Baxa”, pero afirma que ye “una discriminación que los diputaos que lo faigan tengan que dividir el tiempu d’intervención p’autotraducise”. Poro, recuerda que “ye la propia Constitución Española la que reconoz la pluralidá llingüística del Estáu y afala a respetar y protexer toles modalidaes llingüístiques d’España como patrimoniu cultural que son, independientemente de si son oficiales o non”.

Sicasí, Iniciativa pol Asturianu ye consciente de que la situación tien una fácil solución, que ye la oficialidá. “Ensin una reforma del Estatutu d’Autonomía que reconozca los drechos llingüísticos, los asturianos y les asturianes tamos condergaos a ser ciudadanos de segunda”, apunta’l so presidente Iván Llera.

Respeuto al debate llingüísticu nes Cortes, el periodista reconoz que ye “una bona noticia. “La visibilidá que puede tener l’idioma nesti foru tien un valir especial como elementu normalizador, pero ye importante recalcar qu’únicamente cola oficialidá s’atayaría de manera definitiva cualesquier tipu de discriminación por usar llibremente les nueses llingües”, concluyó.

Na semeya, la Mesa del Congresu nel so primer aconceyamientu celebráu'l 18 d'agostu.