"Nel sieglu XIX Asturies ye un territoriu identificable y si lo ye, ye que tien entidá", diz Carmona (2/3)

Segunda entrega del especial pol Día d'Asturies nel que recuperamos les intervenciones del alderique 'La idea d’Asturies: pasáu, presente y futuru' qu’entamó en xunu Grana y la Sociedá Cultural Xixonesa. David Guardado, autor del ensayu 'Nunca vencida. Una historia de la idea d'Asturies', tuvo acompañáu por polos historiadores José Luis Carmona y Margarita Fernández Mier, faciendo la moderación Iris Díaz Trancho.

Les élites

El mitu de Cuadonga foi’l primeru que se trató. Fernández Mier apuntó que “lo que nos cuenten les cróniques y tou esi discursu ye’l que faen les élites dende’l sieglu X, y eso nun nos permite entruganos nin llegar a ver lo qu’en realidá hai detrás, dende’l puntu de vista de la mayor parte d’esa población, de la que nun sabemos absolutamente nada y que la escondemos dende’l puntu de vista históricu”. Más alantre, especificaría que les cróniques “nun nos valen pa dicinos lo que ta pasando nel sieglu VIII. Lo que tán faciendo ye contanos lo qu’ellos quieren ser nel sieglu X; y lo que tán xustificando ye la política d’Alfonso III, que ye nel contestu nel que s’escriben. Xeneren un discursu que, hai que tener en cuenta, trunfó porque siguimos entovía falando d’él”.

Carmona, mentes, arrancó la so intervención calcando na pallabra “élites”, que consideró “pallabra clave nel debate que podamos xenerar”, porque “Asturies ye básicamente a lo llargo de tola historia un país rural onde les élites son poques, a veces con poca influencia, pero siempre van ser capaces d’articular una visión, un discursu, que va terminar calando na sociedá”. “Hai un momentu mui importante que ye’l sieglu XIX, que ye’l momentu nel que los distintos estaos necesiten crear el mitu de la nación, el mitu de los oríxenes, y España, les élites del sieglu XIX, normalmente políticamente conservadores, van alcontrar nos momentos del nacimientu del Reinu d’Asturies, Cuadonga, Pelayo, continuidá de la unificación cristiana y territorial del reinu de los visigodos”, apuntó.

La unificación d’Aragón y Castiella, y la monarquía de los Habsburgo, “que s’articula como una monarquía d’agregación de territorios, caún calteniendo instituciones, derechu consuetudinariu, moneda, llingua y tradiciones diferentes baxo’l paragües de la mesma monarquía”, foi colo que siguió Carmona, “una monarquía que, anacrónicamente, podíamos definir como federalista”. Pero los borbones, “una dinastía d’orixe francés, va romper con esi plantegamientu. Vamos tener, yá pel sieglu XVIII, una monarquía que sigue les pautes del centralismu borbónicu frances: absolutismu, centralismu y progresiva desapaición de toles eses diferencies territoriales”, que “va calar en toles élites poco a poco”.

Reinterpretación de los símbolos

“A min lo que me paez importante ye que con esa visión de les élites, que se convierten hexemóniques, que ta sedimentada a lo llargo de nueve sieglos, les fuerces que construyen discursos alternativos a eses élites incluso se pueden reapropiar d’esos discursos pa dicir absolutamente lo contrario. Y la Reconquista, un términu que ye del XIX, ye un tema clarísimu”, señaló Guardado na so intevención siguiente al repasu de les cróniques de la época d’Alfonso III por parte de Fernández Mier.

Asina, el republicanismu federal, según Guardado, lo que fai ye reinterpretala y plantega que “por supuesto hai una Reconquista, lo que pasa ye que’l procesu ye’l contrariu al que propón l’unitarismu, porque nun ye un procesu d’unificación, ye al revés: Pelayo ye’l qu’entama la lliberación que permite romper la unidá qu’intentaron construyir los visigodos y los musulmanes y que nun consiguieron, tampoco, los borbones. Y ési ye’l discursu de Pi i Margall en ‘Las nacionalidades’”. “Son les coses que yo considero más interesantes y al final ye lo que tien la idea d’Asturies; esos símbolos sí qu’acaben asumiéndose pola xente y cuando cambien los tiempos, les circunstancies, pueden utilizase pa coses radicalmente distintes”.

Enfocando yá’l sieglu XIX, Carmona primero quixo señalar que “nesi periodu de final de la Edá Media, Asturies forma pare de la Corona de Castilla, pero ye l’únicu territoriu autónomu de la Corona”. Asina “nun tien representación nes cortes castellanes porque tien la Xunta Xeneral, onde se dilucida tolo que tien que ver col territoriu, y esto va llegar asina hasta’l sieglu XIX”, apuntando nesi sen qu'a lo llargo del sieglu “Asturies ye un territoriu identificable, y si ye identificable ye que tien entidá”.

L’historiador falaría llargamente llueu del federalismu, “una idea mui vinculada al fracasu de la I República”. “Cuando se proclama la II República’l debate ye si ye federal o nun ye federal, y decídese como nel 68, nin pa ti nin pa min, ye la república integral, que nun ye unitaria pero que tampoco ye federal”, apuntaría darréu Guardado.

(VA CONTINUAR MAÑANA DOMINGU)

Na semeya, Díaz Trancho, Carmona, Guardado y Fernández Mier.