Un Día d'Asturies con movilización na cai, actos políticos y folixa

Esti 8 de setiembre prográmense xornaes en dellos puntos del país y una movilización en Xixón. Llaviana acueye los actos festivos.

Güei celébrase oficialmente'l Día d'Asturies y coleutivos y partíos políticos entamen convocatories que sirven d'entamu del cursu políticu. Mentes, ye sede esti añu del programa festivu del Gobiernu pa festexar esta xornada.

Aína, partíu asturianista de creación nueva que vive'l so primer 8 de setiembre, organiza n'Uviéu, en La Casona de la Montaña, una xornada entitulada '8S de Soberanistes' que xira alredor del actu polítcu 'Asturies, atiendi, Asturies', nel que participen Silvia Fernández, Iyán González y Claudia González. L'actividá va arrancar al meudía con una entrevista d'Isabel Á. Fernández al escritor, llingüista y académicu David Guardado sobre la so obra 'Nunca vencida. Una historia de la idea d’Asturies' y va contar con una actuación de Nacho Vegas, una sesión de DJ Sandrasian d’Abres y actividaes pa la reciella, amás d'una xinta de xermandía.

A la mesma hora, Somos Carreño y el grupu parllamentariu de Podemos na Xunta Xeneral, encuadrán nel Mestu, entamen tamién una celebración. Andecha Tuercipié va facer un pasucais musical dende la Casa Conceyu pa siguir l'actividá en Les Conserveres, onde va haber una comida popular, un actu políticu a les 16.30 hores y un conciertu de 6 Riales y sesión DJ Guaḥiro.

Va ser en Xixón onde va entamase l'actu más reivindicativu. Asturies Insumisa, nel que participen delles organizaciones, una d'elles Andecha Astur, convoca una concentración a les 12.30 hores na plaza Institutu (El Parchís) baxo'l lema 'Polos drechos de la clase obrera' na que demanden, ente otres cuestiones, "la recuperación de los drechos d'Asturies y los que nos correspuenden comu clas obrera". 

Izquierda Xunida (IX), pela so parte, torna a treslladar la celebración del Día d'Asturies al sábadu. Va ser na área recreativa de Santolaya, en Morcín, dende les 12 hores con un actu políticu, una xinta y un homenaxe a veteranos de la coalición.

Dixebra, José Manuel Tejedor y Hevia

Dende mañana y hasta'l domingu hai un ampliu programa festivu en Llaviana con conciertos, baille, gastronomía, teatru, deporte tradicional y un mercáu tradicional. Entes les actuaciones musicales rescamplen la d'Amistades Peligrosas (20 hores) y Dixebra (22 hores) de mañana y les de José Manuel Tejedor (20 hores) y Hevia (22 hores) del domingu.

Otra manera, Adrián Barbón va acudir al muedía como presidente del país a los actos entamaos pol Arzobispáu d'Uviéu y el Cabildu del Real Sitiu en Cuadonga con motivu del Día de la Santina. Pela tarde, a les 18.30 hores, va entregar nel Auditoriu d'Uviéu les Medalles d'Asturies, un reconocimientu que va recibir, ente otros, Xosé Lluis García Arias, primer presidente de l'Academia de la Llingua Asturiana y cofundador y primer cabezaleru de Conceyu Bable.