El XXXIV Premiu al Pueblu Exemplar d'Asturies, pa trés parroquies de Villaviciosa

Son Arroes, que yá lo intentara previamente trés veces en solitariu, Candanal y Pion.

Seis años depués el Premiu al Pueblu Exemplar d'Asturies, qu'entrega la Fundación Princesa de Asturias, torna a Villaviciosa. Si naquella ocasión, nel 2017, foi pa Porreñu, agora merecen esti gallardón con una recompensa de 25.000 euros les dos parroquies del Valle de Pion (Candanal y Pion) y Arroes.

L'acta del xuráu rescampla que tán "formaes por pequeños grupos de población esperdíos pel territoriu que caltienen elementos que conformaron la so historia y la tradición, asina como una economía basada n'actividades agroganaderes y agroalimentaries tradicionales, que güei combinen con otros sectores emerxentes". Apunta tamién que "tán implicaes nel Centru d'Intelixencia Territorial y Teunoloxíes pal Mediu Rural (CTIC Ruraltech)" pa la "recuperación de la cultura llocal y los 'saberes llabradores', onde tán presentes tanto neños como mayores" y que les trés parroquies "mantienen una estrecha rellación gracies a les sos dos asociaciones vecinales: Valle de Pion-Candanal y Arroes".

Esti gallardón busca reconocer al "pueblu, aldea, nucleu de población, espaciu paisaxísticu o grupu humanu del Principáu d'Asturies que rescamplara de mou notable na defensa y conservación del so entornu natural, ambiental, del so patrimoniu históricu, cultural o artísticu, n'iniciatives d'impulsu económicu y social o na realización d'obras comunales o otres manifestaciones de solidaridá sobresalientes”. Un total de 26 candidatures aspiraben a ser Pueblu Exemplar.

Bases nes trés llingües y respetu a la toponimia

El reglamentu del XXXIV Premiu al Pueblu Exemplar d'Asturies espublizóse, al igual que nes ediciones anteriores, nes trés llingües falaes nel país: asturianu, gallego-asturiano y castellanu. Amás, el premiu respeta la toponimia asturiana, única oficial en 74 de los 78 conceyos asturianos, como amuesa que l'añu pasáu emplegara Cadavéu y non el derogáu 'Cadavedo', y que güei la Fundación Princesa de Asturias venga utilizando Pion y non 'Peón'.