El Centru d’Educación p’Adultos de Xixón condiciona’l módulu de Llingua Asturiana a un mínimu d’alumnos

Los estudiantes que se matriculen nel Centru d’Educación de Persones Adultes de Xixón atopen nel formulariu que'l modulu de Llingua y Lliteratura Asturiana ta “condicionado a número de solicitantes y nombramiento de profesor especialista”. Iniciativa pol Asturianu recuerda qu’una sentencia del Tribunal Supremu eliminó’l ratio mínimu pa poner clase d'asturianu y que s'incumple la Llei d'Usu.

La organización califica esta situación como un casu nuevu de “discriminación” al idioma. “Esto nun ocurre con nengún otru módulu formativu de la escuela pa la formación d’adultos nin con otros centros”, avisen.

Foron delles les quexes que llegaron a Iniciativa pol Asturianu pol fechu de que nel formulariu de matrícula de les distintes asignatures y módulos del segundu nivel recoyera nel casu del de Llingua y Lliteratura Asturiana que ta “condicionado a número de solicitantes y nombramiento de profesor especialista”. Una situación que “atenta contra la Llei d’Usu y Promoción del Bable/Asturianu”, que, nel so artículu 10, garantiza “nel exerciciu de les sos competencies, el Principáu d’Asturies ha garantizar l’enseñu del bable/asturianu en tolos niveles y graos, respetando sicasí la voluntariedá del so aprendimientu”, y que más en concretu nel puntu 2 dexa nidio que “los principios anteriores fadránse estensivos tamién a la educación permanente d’adultos”.

D’igual forma sorraya que “nun hai sistema de ratio mínimu d’alumnos matriculaos pa poner clases d’asturianu en nengún nivel o estaya educativa. Esta esixencia foi declarada illegal pola sentencia confirmatoria de la Sala de lo Contencioso-Alministrativo, Estaya Cuarta, del Tribunal Supremu, con fecha 24 d’abril del 2012”.

“Nun pue ser que l’alumnáu que quiera estudiar asturianu tenga que depender del total de matrícules cuando la normativa nun esixe esi mínimu. Por esti motivu, esiximos la modificación urxente del formulariu de matriculación del CEPA de Xixón suprimiendo esi avisu sobre la matriculación nel módulu de Llingua y Lliteratura Asturiana”, reclama Iniciativa pol Asturianu, que solicita tamién a la Conseyería d’Educación “que compruebe de forma inmediata si'l restu de centros d'adultos tán incumpliendo de la mesma manera la llexislación vixente, yá que dellos nun cunten tampoco con profesoráu d'asturianu nesti cursu”.

Por último, afala “al unvíu d’una circular a tolos centros educativos públicos y concertaos recordando’l drechu a la matriculación na asignatura independientemente del númberu d’alumnos y alumnes que lo soliciten”.