Dixebra, José Manuel Tejedor y Hevia van tocar nos actos pol Día d’Asturies en Llaviana

Del vienres al domingu Llaviana va acoyer les celebraciones pol Día d’Asturies qu’entama’l Gobiernu. Un ampliu programa destináu a un públicu familiar va desenvolvese estos trés díes alredor del 8 de setiembre, con un mercáu tradicional y grandes conciertos con Dixebra, José Manuel Tejedor, Hevia y Amistades Peligrosas.

Llaviana, que toma’l relevu de Corvera, y tola cuenca d’El Nalón cuenten los díes pa vivir un Día d’Asturies siempre especial. Música, baille, gastronomía, teatru, deporte tradicional y folixa componen los ingredientes d’una celebración d’altor que se celebra per primer vegada nel conceyu.

Ana Vanessa Gutiérrez, viceconseyera de Cultura, Política Llingüística y Deporte, desplazóse a Llaviana pa presentar xunto col alcalde Julio García Rodríguez unos festexos de los que rescampló “l’ambiente familiar”, con actividaes “a lo llargo de tol día”. Un mercáu tradicional “que va traer más de 70 puestos d’artesanos y productores asturianos a la cai Llibertá” va animar La Pola Llaviana dende’l vienres al meudía, momentu nel que tamién hai programaos un pasucais del Grupo Folklórico Virgen del Otero, una exhibición de deporte tradicional nel Parque de los Príncipes y unos talleres de deporte adaptáu na pista Joaquín Blume que pon la Federación de Deportes de Minusválidos Físicos d’Asturies (FEDEMA), activaes éstes dos últimes que van repetise na tarde y nel restu de xornaes.

Ente otres munches actividaes que detalló la escritora que sustiúi a Berta Piñán nel cargu, atópáse’l proyeutu ‘Cantares de… y pa neñ@s’ (19 hores, Xardinos de Palacio Valdés) de Fernado Valle Roso y Silvia Moreno, col platu fuerte del vienres dende les 20 hores na plaza de la Casa Conceyu con Amistades Peligrosas y, dende les 22, con Dixebra. El sábadu van encargase d’animar la nueche dos gaiteros d’esceición como José Manuel Tejedor y Hevia, mentes qu’a les 17.30 hores y les 12.30 hores del domingu va haber espaciu pa la canción asturiana nel Quioscu la Música.

L’alcalde, na so intervención, rescampló la posibilidá que da acoyer los actos pol Día d’Asturies de “mostrar a toos aquellos que vengan per equí esa fin de selmana la hospitalidá del pueblu de Llaviana y la profesionalidá y el bon facer tanto de la hostelería como del comerciu llavianés”. Tamién apuntó que se van reforciar los servicios d’autocar, tanto de día como de nueche, pa que tola xente del valle pueda disfrutar de la celebración.