El Gobiernu crea una llinia d'ayuda pa incorporar al mercáu llaboral a menores de 30

Va dedicar en 2 años cuasi 2,3 millones d'euros. El Conseyu de Gobiernu aprobó cinco nomamientos más pa la estructura nueva.

El Gobiernu abre una llinia d'ayudes pa favorecer la incorporación al mercáu llaboral, con un contratu en práutiques, de desemplegaos menores de 30 años. Ésta va executase en dos víes: per un llau'l Serviciu de Emplegu del Principáu d'Asturies (SEPEPE) va destinar 1,2 millones a apoyar a les empreses que faciliten esta esperiencia llaboral a mozos titulaos universitarios que tán en paru llueu de terminar los sos estudios, y per otru van dedicase 1,1 millones a sofitar la contratación en práutiques de xóvenes desemplegaos inscritos nel Sistema Nacional de Garantía Juvenil.

Les empreses qu'opten a estes ayudes tienen que cumplir los requisitos de contar con centros de trabayu n'Asturies y el formalizar contratos formativos pa la obtención de la práutica profesional afayadiza al nivel d'estudios de los beneficiarios. La midida tien calter retroactivu, asina que van poder acoyese compañíes que fixeren esti tipu de contratos ente'l 31 de marzu del 2022 y el 30 de xunu del 2023.

Trés direiciones y dos xerencies

Nel Conseyu de Gobiernu d'esta mañana, ente otros asuntos, tamién s'aprobaron cinco nomamientos más de la estructura nueva del Executivu. Javier Cueli va ocupar la Direición Xeneral de Planificación de Formación Profesional; y Ignacio Iglesias, d'Empresas, Pymes y Entamadores, entrambos dientro de la Conseyería de Ciencia, Empreses, Formación y Emplegu; y Javier Vigil, de Xestión Forestal, enmarcada na de Mediu Rural y Política Agraria.

José Ramón Feito va ser xerente de la Comisión Autonómica del Bancu de Tierres, perteneciente tamién a dicha conseyería, y Nerea Monroy del Organismu Autónomu Establecimientos Residenciales para Mayores d'Asturies (ERA), dependiente de Derechos Sociales y Bienestar.