“Lo importante d’estos premios internacionales ye’l reconocimientu al asturianu y la visibilidá que dan al idioma”, espresa Blanca Fernández

Crei Acli y Fondazione di Sardegna concedieron-y el II Premio Ondras “pola promoción de les llingües minoritaries europees” a Blanca Fernández, qu’esti mesmu añu recibiera tamién n’Italia, nel Piemont, el XV Premio Ostana de creadores en llingües maternes. “Lo importante d’estos premios internacionales ye’l reconocimientu al asturianu y la visibilidá que dan al idioma”, rescampla l’autora yerbata.

Va quince díes un corréu electrónicu llegó al so buzón dende Sardigna solicitando-y un currículu y ayeri facíase’l públicu’l fallu del gallardón. Fernández taba ente los cuatro persones merecedores del II Premio Ondras valoraes por una comisión d’espertos conformada pol escritor Giuseppe Corongiu, escritor y activista en defensa de la llingua sarda; el sociólogu y comunicador na RAI en sardu, Nicolò Migheli; y la periodista de televisión, editora y esperta en política llingüística, Maria Antonietta Piga.

Xunto a la de Bimenes, a la que valoren como “una moza que, col so compromisu y les sos espublizaciones, distinguióse na Península Ibérica pola novedá de los conteníos de les sos obres en llingües minoritaries, na so mayoría ciencia ficción y distopía”, resultaron reconocíos Antonella Sorace, Guido Menshing y Gianfranco Fronteddu, los trés por iniciatives al rodiu la llingua de la islla. El xuráu presenta tamién a Fernández como “un exemplu lluminosu pa tolos mozos d’Europa pa la salvación y promoción de les llingües autóctoes, polos temes innovadores, orientaos al futuru, que proponía nes sos obres lliteraries”.

Estaya de ‘Mocedá’ nel Ostana

“Son premios que nunca esperes y préstenme muncho, pero lo importante d’estos premios internacionales ye’l reconocimientu al asturianu y la visibilidá que dan al idioma. Tolo que sía normalizar la situación del asturianu ye bien”, espresa la escritora, qu’en xunu tuvo nel Piemont pa recoyer el XV Premio Ostana nun viaxe esprés por cuenta les oposiciones, lo que-y obligó a recortar la so estancia nesti guapu pueblu asitiáu nos Alpes, frente al monte Vísol.

Nesti casu, la razón del premiu yera reconocer el so llabor na escritura na so llingua materna, proclamándose ganadora na estaya de ‘Mocedá’, gallardón que tuvo repercusión na prensa italiana, llegando a protagonizar una fueya del periódicu 'Il Manifesto'. En total l’Associazione Chambra d'Òc, que s’ocupa de la promoción y valoración de la llingua occitana, reconoció al poeta Hawad (llingua tamahak falada en Níxer) col ‘Especial’; Bernardo Atxaga (eusquera) col ‘Internacional’; Liliana Bertolo (francoprovenzal) col de ‘Minoría Llingüística Histórica n’Italia’; Monica Longobardi (occitanu n’Italia) col de ‘Traducción’; Sarah Laurent-Zurawczak (occitanu en Francia) col de ‘Llingua Occitana’; Fiona Mackenzie (gaélicu) col de ‘Composición Musical’; y Julie Perreard (corsu) col de ‘Cine’.

“La esperiencia foi mui bona. Nun tuviera nunca nin en Turín nin n’Ostana, que ta a unes dos hores, a 1.300 metros y ye mui guapu”, apunta Fernández, que punxo una charra sobre la lliteratura de fantasía n’asturianu. “Llevé obres de Dolfo Camilo y Vicente García Oliva, autores que nun conocíen, y tuvo mui bien”, diz la escritora, qu’apunta que se centró nesti xéneru namás, ensin entrar nel de ciencia ficción o terror.

“Los asistentes amosaron una bona actitú pa col asturianu y interesáronse. Sorprendió-yos munchos la cantidá de traducciones de xéneru esistentes”, añadió. Nesi sen rescampla que tantu esti gallardón como’l sardu “ye un reconocimientu a la lliteratura de xéneru, que na nuesa lliteratura se trabaya dende los 80”.

Posibilidá de facer dalgo conxunto con autores n’otres llingües

Una esperiencia, en definitiva, que valió “pa facer contautos, munchos contautos con otros autores, occitanos y d’otros sitios, de los que ye posible que salga dalgo conxunto”. Amás, dende la organización tornóse’l premiáu rellatu ‘Eutopos’ de la yerbata, a partir del que ta trabayando nuna novela de ciencia-ficción que retomó recién depués d’una axenda mui cargada pol trabayu, l’estudiu, la participación nel 232 d’Avilés, la llectura del pregón na XXVII Fiesta de la Oficialidá de la Llingua Asturiana, la gala de los Premios Lliterarios 2022 o la conferencia presentada la selmana pasada na Universidá Asturiana de Branu (UABRA), amás d’otra de terror.

El sábadu 30 de setiembre Fernández va volver a garrar l’avión pa desplazase a Casteddu/Cagliari pa recibir el II Premio Ondras. Otra oportunidá de vivir una gran esperiencia xunto con otres persones esmolecíes por defender la llingua de casa y pa poner nel mapa la llingua asturiana y la so lliteratura.

Na imaxe, Fernández col so Premio Ostana. Semeya obra d'Andrea Fantino.