Iniciativa pol Asturianu rescampla "el compromisu llingüísticu" de Xulio Ramos

La organización muestra públicamente'l so pesar pola muerte del cantante y compositor.

Hores depués de conocese'l sábadu la perda de Xulio Ramos, Iniciativa pol Asturianu asoleyó un comunicáu pa mostrar el so pesar pol so fallecimientu. Nel mesmu fai referencia a "la so carrera musical na que la llingua asturiana siempres tuvo un papel fundamental, dende los sos entamos musicales formando parte de la xeneración del Nuevu Cantu Astur", amás del so interés pol teatru, "compartiendo de mozu esta afición col escritor Andrés Solar".

D'igual forma defínelu como "una persona exemplar pol so compromiso llingüísticu. Foi un exemplu de defensa del idioma y de poner la so capacidá de creación musical al serviciu del mesmu". Por último, pon en valor que "nos últimos años compartió espaciu y collaboración con Iniciativa pol Asturianu nel Conseyu Asesor de Normalización Llingüística de Xixón".