Finó Xulio Ramos, voz imprescindible del Nuevu Canciu Astur

El cantante uvieín tenía 74 años d'edá y foi autor del históricu discu 'Esparabanes'.

Xulio Ramos, una voz imprescindible del Nuevu Canciu Astur, dexónos na mañana del sábadu. Nun pudo superar les consecuencies d'un ictus.

Nos sos entamos formó parte de grupos de música pop como Los Ángeles o Los Juniors, pero ye en Madrid onde tien el so primer ésitu musical. Na segunda década de los 70 torna a Asturies y nunos pocos años pasa a convertise nún de los referentes del Nuevu Canciu Astur, el movimientu qu'engloba a un piñu de cantantes como Carlos Rubiera o'l dúu Nuberu que componen n'asturianu, dando modernidá y presencia al idioma nunos años de gran movimientu cultural.

Ente les sos creaciones rescampla 'Esparabanes', discu asoleyáu nel 1980 pola Sociedad Fonográfica Asturiana, una obra diferente cercana al rock que marcó un enantes y un depués. Nesos años fixera amistá con Andrés Solar, col que compartíu afición pol teatru.

La despidida de Ramos tuvo llugar ayeri en Xixón, nel Tanatoriu-Xardín El Lauredal, nel que nun faltó la música y la poesía. Acudieron numberosos representantes del PSOE, partíu nel que militaba.

L'equipu que formamos Asturies.com queremos unviar un abrazu a familiares, amigos y compañeros por esta triste perda pa la nuesa cultura.