La gala de los Premios Lliterarios y el Nel Amaro torna a Uviéu

El patiu del Palaciu Conde Toreno acueye a los ganadores de la convocatoria del 2022.

La gala d'entrega de los siete Premios Lliterarios y el VI Premiu y Festival Nel Amaro en Llingua Asturiana o Gallego-asturiano que convoca la Conseyería de Cultura, Política Llingüística y Turismu torna a Uviéu trés ediciones depués y nuna fecha inusual, en plenu branu. La de les 2019 celebróse nel salón d'actos del Muséu Arqueolóxicu d'Asturies, mentes que les dos últimes tuvo como sede LLABoral Centru d'Arte y Creación Industrial n'abril del 2022.

La conseyera Berta Piñán y la de Facienda, Ana Cárcaba, y el direutor xeneral de Política Llingüística, Antón García, y el d'Ordenación, Evaluación y Equidá Educativa, David Artime, van tar presentes nesti actu, que va tener un pieslle musical protagonizáu por Daniel García de la Cuesta y Luis Núñez. L'actu ta previstu pa les 19 hores de mañana y l'accesu ye de baldre.

Como novedá, van presentase tamién les ediciones de les diferentes obres gallardonaes. Los autores ganadores, que van recibir un troféu conmemorativu, son Gonzalo González Barreñada por 'El viaxe del cacique' (XLIII Premiu Xosefa Xovellanos de novela); Marta Mori por 'Los carreros del tiempu' (XXVIII Premiu Xuan María Acebal de poesía); Damián Barreiro por 'Asturianía kitsch: Decálogu de la cultura pop astur' (XXVIII Premiu Máximo Fuertes Acevedo d'ensayu); Blanca Fernández por 'El cartafueyu d’Alquimia' (XV Premiu María Josefa Canellada de lliteratura infantil y xuvenil); Guillermo Menéndez Quirós por 'Ana María. La llobera d’Asturies' (XIV Premiu Alfonso Iglesias de cómic); María Antonia Pedregal por 'La palabra final. Diariu d'un suicidiu' (II Premiu Florina Alías a la meyor traducción); y Andrés Fernández Menéndez por '1929' (III Premiu Enriqueta González Rubín de narrativa moza).

Mentes, Carlos Alba va recibier el Nel Amaro pola so obra de teatu 'Les madreñes vacíes'.

Aconceyamientu del xuráu del Xuan María Acebal

Esta tarde va tener llugar l'aconceyamientu del xuráu del XXIX Premiu Xuan María Acebal de poesía, correspondiente a los Premios Lliterarios d'esti añu. La cita ta prevista a les 16.30 hores na sede de la conseyería.

Na imaxe, cubierta de les obres ganadores de los Premios Lliterarios 2022.