L'asturianu tuvo presente en Vitoria-Gasteiz nun alcuentru mozu sobre llingües minorizaes

El IV HIGA! convidó a Iniciativa pol Asturianu pa dar a conocer la situación del idioma.

Esti alcuentru de xóvenes falantes de llingües minorizaes desenvolvióse la selmana pasada en Vitoria-Gasteiz entamáu pol ayuntamientu, y enmarcáu nel programa formativu de los cursos de branu de la Universidad del País Vasco/Euskal Herriko Unibertsitatea, con 65 idiomes representaos, dende'l sardu al occitanu pasando pol náhuat o l'eusquera. Ente ellos tuvo la llingua asturiana, cola presencia d'Alma Hidalgo, vocal de Mocedá y Voluntariáu del coleutivu.

La xixonesa espunxo la situación actual del asturianu y el bon momentu actual pa la so recuperación y normalización. D’igual manera, recordó lo positivo que resulta pal idioma cuntar con una presencia importante nes redes sociales y cómo la llingua asturiana ta revitalizándose nes xeneraciones nueves.

Insistió tamién na importancia de la declaración d’oficialidá nel Estatutu d’Autonomía y señaló que l’asturianu ye una de les poques llingües que participen nel congresu qu’entá nun tien un estatus d’igualdá nel sistema xurídicu, dalgo que xenera torgues pa los sos falantes y complica la tresmisión xeneracional. La complicada situación del idioma na escuela, qu'afeuta direutamente al so conocimientu, tratóse igualmente nesti alcuentru de cinco díes de llargor que tien como principales oxetivos la revitalización de les llingües minorizaes y el trabayu en rede ente las diferentes comunidaes internacionales de falantes.

La presencia n'Euskadi d'Hidalgo valió amás pa dar a conocer la trayeutoria d'Iniciativa pol Asturianu "dende la so fundación en 2011, atrayendo nuevos perfiles y sensibilidaes al trabayu colectivu pol idioma, llogrando sumar voluntaes y trabayar en positivo pola so normalización abriendo nuevos espacios pa la dignificación de la llingua asturiana".

Na semeya, participantes nel IV HIGA!.