Alemaña lidera la llista de destinos de les esportaciones asturianes

Les esportaciones crecieron un 8 por cientu, hasta los 2.730,1 millones d’euros, nos 5 primeros meses del añu en comparanza col mesmu periodu del añu pasáu. Alemaña lidera la llista de destinos, con 336,1 millones en ventes, con Francia y Italia en segundu y tercer llugar, de manera respeutiva, y Marruecos como país col mayor aumentu.

El cinc y les sos manufacturas y automóviles son los principales productos que se comercialicen con Alemaña dende Asturies. Estí país supera a Italia como principal llugar de destín por mor d’un incrementu del 68,6 por cientu de les cifres de comerciu, mentes que col anterior líder baxó un 36,8 por cientu al rexistrar 244,6 millones, según los datos aportaos pola Sociedá de Promoción Esterior (Asturex).

Francia ocupa’l segundu escalón, con un negociu de 314,1 millones magar baxar un 1,7 por cientu. Desciende tamién con Portugal, unn 4,4 por cientu, al asitiase en 215,7 milllones.

Pela so parte, rexistren importantes aumentos Países Baxos (un 114,8 por cientu al llegar a 176,5 millones), Reinu Xuníu (un 37,6 por cientu con 161,7 millones) y Marruecos, el que más medra (426,6 por cientu con 143,5 millones de comerciu, principalmente combustibles y aceites minerales). Completen la llista de los diez primeros Turquía (124,9 millones), Estaos Xuníos (108,7) y Bélxica (101,7).

Saldu comercial positivu

L’incrementu mediu de las esportaciones hasta mayu queda nun 8 por cientu al llegar a los 2.730,1 millones. El saldu comercial ye positivu en 116,4 millones, yá que les importanciones asitiáronse en 2.613,7 millones.

En total fixeron operaciones col estranxeru 1.421 empreses, de les que 583 son esportadoras regulares, un 1,2 por cientu más. El cinc y les sos manufactures siguen siendo esti 2023 les principales partíes de les esportaciones regionales magar a que baxen un 19,1 por cientu con respeuto al mesmu periodu del añu anterior, non tanto en volumee tonelaes como en términos económicos, colos combustibles y aceites minerales en segunda posición y la fundición, el fierro y l’aceru, en tercera.

Na semeya, la bandera alemana frente al Deutscher Bundestag, el Parllamentu.