Iniciativa pol Asturianu aconceya con ediles de Xixón y Avilés p’analizar la situación y treslladar propuestes

Los trés ediles de la oposición en Xixón y el nuevu conceyal de Llingua y Deporte d’Avilés, David García Álvarez, son los primeros políticos colos qu’Iniciativa pol Asturianu axuntó depués de les eleiciones conceyiles del 28-M. L’oxetivu d’estos alcuentros, que van siguir con representantes de Llangréu, Mieres y Carreño, ye analizar la situación posteleutoral y treslladar propuestes sobre normalización llingüística.

El presidente d’Iniciativa pol Asturianu, Iván Llera, y la vocal de Mocedá y Voluntariaú, Alma Hidalgo, entamaron la selmana pasada esta ronda de contautos. En Xixón conversaron con José Ramón Tuero (PSOE), Javier Suárez Llana (Convocatoria por Xixón) y Olaya Suárez (Podemos), a los qu'informó sobre "la preocupación pola entrada nel gobiernu municipal de quien defende postures de marxinación hacia la llingua asturiana" que tien la organización.

Encamentaron a los conceyales "a tar xixilantes énte posibles recortes al idioma” y recordaron “la necesidá de trabayar pa llograr un nuevu Plan de Normalización Llingüística". Tamién reclamaron "una mayor y meyor presencia del asturianu na páxina web del conceyu y un reglamentu d’usu de la llingua asturiana que recueya de manera oficial el criteriu d’usu pal idioma per parte de l’alministración local".

Un Plan de Normalización

La situación n’Avilés, mentes, ye distinta, con un gobiernu de coalición de PSOE y Cambia Avilés que creó una Conceyalía de Llingua y Deporte, que lleva la coalición. Nel alcuentru con García Álvarez “l’asociación propunxo-y la posibilidá de crear un muérganu consultivu relativu a la política llingüística nel Conceyu, asina como l’aprobación d’un Plan de Normalización que fixe los oxetivos y midíes nesta materia a lo llargo d’esta llexislatura”.

D’igual manera plantegóse “la necesidá d’incorporar el derechu de la ciudadanía a dirixise n’asturianu al Conceyu bien mediante la modificación del reglamentu o al traviés d’una ordenanza específica”. Les próximes xuntes programaes por Iniciativa pol Asturianu ye colos responsables de la política llingüística de los conceyos de Llangréu, Mieres y Carreño, cola intención d’ampliales depués a representantes políticos de tol país.

Na imaxe, Avilés. Semeya propiedá del Conceyu d'Avilés.