Apaez na mar el cuerpu ensin vida del alcalde de Sotu'l Barcu

Jaime Pérez Lorente 'Jimi', del partíu llocal CISB, taba desapaecíu dende'l martes y el so coche, aparcáu na zona d'El Cabu Vidíu.

Esta mañana confirmábense los peores presaxos. Un cuerpu ensin vida yera llocalizáu por un helicópteru de Bomberos d'Asturies na mar nuna zona de díficil accesu d'esti llugar del conceyu de Cuideiru, a la qu'acudieron Grupos Especiales d'Actividaes Subacuátiques (GEAS) de la Guardia Civil pa rescatalu, confirmando que se trataba del primer edil.

El Conceyu de Sotu'l Barcu asoleyó darréu un comunicáu nel qu'amuesa "el nuesu más fondu dolor pola muerte del nuesu alcalde". Decreta d'igual forma trés díes de llutu oficial, dende les 14 hores de güei a les 14 del sábadu.

Na semeya, Pérez Lorente na so investidura como alcalde'l 17 de xunu. Semeya propiedá de la Candidatura Independiente Soto del Barco.