El Premiu Xuan María Acebal de poesía repite como’l gallardón con más participación

La Conseyería de Cultura, Política Llingüística y Turismu dio a conocer los datos de participación de los ocho Premios Lliterarios y los dos artísticos. En total son 71 obres presentaes, cuatro más que nel 2022, a los qu’hai que sumar les 9 del Premiu Pachín de Melás de testos teatrales de creación nueva, repitiendo como’l más demandáu, con 15, el Premiu Xuan María Acebal de poesía, que tuvo 13 candidatos na convocatoria del añu pasáu.

Dende’l Gobiernu dedíquense nesta ocasión 57.000 euros, los 51.000 del añu pasáu más 6.000 más del Pachín de Melás, qu’amás tien como premiu’l montaxe de la obra ganadora. Magar ser la primer convocatoria, esta propuesta cola que se prentende “fomentar y incentivar la creación d’obres dramátiques n’asturianu y ampliar el corpus d’obras teatrales de la lliteratura en llingua asturiana”, tien 9 propuestes.

Ye’l de poesía, que va pola so ventena novena edición, sicasí, el que caltién mayor puxu, con 15, dos más que l’añu pasáu. El siguiente na llista ye’l XVI Premiu María Josefa Canellada de lliteratura infantil y xuvenil, con 13, tamién dos más nel que 2022.

Al III Premiu Florina Alías a la meyor traducción llegaron 12 trabayos, cuatro más, mentes qu’al XLIV Premiu Xosefa Xovellanos de novela y al XV Premiu Alfonso Iglesias de cómic, únicu del que yá se conoz ganador, Xon de la Campa con ‘Misteriu nel soterrañu’, 6 a caún. Supón la mesma cantidá pal gallardón gráficu y ún menos pal de prosa.

Completen los Premios Lliterarios el XXXIX Premiu Máximo Fuertes Acevedo d'ensayu, que ye’l que protagoniza la mayor baxada, al pasar de 12 a 4 trabayos, y el III Premiu Enriqueta González Rubín de narrativa moza, con 3 obres, a la que l’añu pasáu namái se presentó 1.

Aumenta’l Camaretá

No que respeuta a los premios artístiscos, rescampla l’aumentu nel XV Premiu Camaretá al Meyor Cantar, al presentase 9 propuestes poles 4 del añu pasáu. D’elles, cuatro pasaron a la gala final del domingu 12 de payares nel Teatru de la Llaboral: Marisa Valle Roso, con ‘Tonada’; Alienda, con ‘Zanca de cabra’; José Manuel Tejedor, con ‘Les tos nales’; y Vero Rubio, con ‘Dixo miou padre’.

Por contra, baxó nel VII Premiu y Festival Nel Amaro en Llingua Asturiana o Gallego-asturiano, que pasa de 5 a 3. Les trés obres presentaes (‘Xuan Soldáu’, de Carlos Alba; ‘El gorrumbu’, de Saltantes Teatro; y ‘Caperucita en Muniellos’ (sic), d’Escenapache) tienen nivel pa pasar el corte del xuráu y participar na parte de festival, onde se decide’l ganador.

Gallardones en gallego-asturiano

Amás de los Premios Lliterarios en llingua asturiana, la conseyería tamién promueve dos en gallego-asturianu entamaos por entidaes llocales. Asina, xunto col Conceyo da Veiga promociona’l Premio Río del Eo de Poesía en Galego-asturiano, y cola Fundación Parque Histórico del Navia’l Premio Quiastolita de Lliteratura Infantil, qu’entrambos encaren la so tercer edición.