La Nueche Celta nel área d'El Puntal, repite

La comisión de fiestes de Samartín del Mar entama la segunda edición d'esta folixa depués de la bona esperiencia del añu pasáu.

Llegó pa quedar. L'área recreativa d'El Puntal va acoyer mañana la Nueche Celta qu'entamen les vecines y vecinos de la parroquia asitiada nel conceyu de Villaviciosa.

Una gran carpa va instalase nel llugar por si l'agua apaeciera pa la fiesta, d'accesu con entrada a 6 euros a la venta en dellos puntos del conceyu, per Bizum al teléfonu 609.127.146 y na propia puerta, que va abrir a les 20.45 hores. Los asistentes van poder disfrutar de les actuaciones d'Héctor Braga y Simón San José; el proyeutu de Xuacu Amieva, Dobra; Burbús; y Skama la Rede.

Fiesta de branu

La Nueche Celta d'El Puntal encuádrase na fiesta de branu de Samartín del Mar, qu'arranca esta tarde a les 19 hores col campeonatu de parchís y el de tute, a les 21 hores. El domingu, mentes, entámase la xinta del pueblu.