Ana Pereira lleva’l III Premiu Radagast de Lliteratura Fantástica, Ciencia Ficción y Terror con ‘Cuntaora’

La presentación del llibru ganador del II Premiu Radagast de Lliteratura Fantástica, Ciencia Ficción y Terror, ‘La vieya’ d’Aique Fernandi, abrióse cola anuncia de la obra merecedora de la tercer edición d’esti concursu singular pola so temática. Foi ‘Cantaora’, una novela "cyberpunk" que presentó a concursu Ana Pereira.

El llar de Cuatro Gotes Producciones, nel xixonés barriu L’Arena, acoyó esti actu col que Ediciones Radagast celebró una edición nueva, la correspondiente al 2022, d’un gallardón “que pretendemos siguir convocando tolos años”, apuntó Nicolás Bardio, responsable de la editorial. “A ver si l’añu que vien podemos ampliar les temátiques y consiguir que participe muncha xente”, añadió.

Si na primer edición foi una obra de fantasía la ganadora, 'Trovadoresca' de Blanca Fernández, y la segunda, de terror, ‘La vieya’ de Fernandi, nesta ocasión correspondió-y al xéneru que faltaba, el de la ciencia ficción. “Ye un poco cyberpunk”, apuntaba l’autora, que lleva una recompensaba de 300 euros, amás d’un espetu conmemorativu, un diploma y la espublización del llibru.

“Ye l’únicu premiu priváu qu’hai. Salieron llibros nestes ediciones mui bonos y hubo otres noveles que nun ganaron que son mui bones tamién. Inclusive a dalguna finalista acabamos sacándola”, apuntó Bardio, qu’acompañó a José Luis Rendueles na presentación de ‘La vieya’, actu que consistió nun alderique del escritor xixonés col autor Fernandi.