L'asesora de Cultura del PP en Xixón sofita'l vetu ideolóxicu de VOX en Festexos a los artistes que defendan la oficialidá

L'asesora de Política Cultural del Partido Popular (PP) en Xixón, que foi xerente del Teatru Xovellanos con Foro, y que representó a los populares en Divertia la llexislatura pasada, ta acabante facer unes declaraciones nes que sofita’l vetu a los artistes que defendan la oficialidá del asturianu.

 

Nun artículu nel mediu dixital MiGijón afirma que ta a favor de la presencia del asturianu na programación de Festexos y diz defender la llibertá de creación pa que los artistes "espresen el so arte na llingua qu’ellos quieran", polo qu’aplaude la "rectificación" de la conceyala de Festexos de VOX. Sara Concepción Álvarez Rouco anunciara que nun se diben contratar artistes qu’usaren l’asturianu, anque depués afirmó que a quien nun se diba contratar ye a defensores de la oficialidá del asturianu.

 

 

Sicasí, l'asesora de cultura del PP, sí sofita a Álvarez Rouco cuando la conceyala de Festexos afirma que "nun contratarán actuaciones n’asturianu que sían una plataforma de apoyo a la oficialidá”. Según Sánchez, esti vetu ye positivu porque supón tar "a favor de la llibertá y non de la imposición".

En definitiva, la ex xerente del Teatru Xovellanos, y una de les cabeces visibles del equipu de cultura del PP xixonés, diz apoyar la "promoción y apoyu al asturianu" pero siempre que se faiga ensin lo que considera la "reivindicación política" de la oficialidá del asturianu, qu’ella interpreta como una "imposición", sumándose asina a la defensa de la censura ideolóxica qu’anuncien los conceyales d’ultraderecha dende la conceyalia de Festexos.