La conceyalía de Festexos de Xixon va estudiar el perfil de los artistes qu'usen l'asturianu enantes de contratalos

Sara Concepción Álvarez Rouco, conceyala de VOX de Festexos en Xixón, compareció esti llunes énte los medios pa, según dixo, matizar y esclariar el so posicionamientu sobre les contrataciones futures. “Si la promoción del espectáculu n’asturianu va ser una plataforma d’apoyu a la oficialidá de la llingua, nós nun vamos apoyalo”, afirmó, al tiempu que confirmó que se va estudiar primero la trayeutoria de los artistes.

La tamién diputada na Xunta Xeneral lleó un testu que quixo resumir declarando que “lo que nun queremos ye tocar el conflictu de que se confunda la oficialidá colos espectáculos n’asturianu, porque si la promoción del espectáculu n’asturianu va ser una plataforma d’apoyu a la oficialidá de la llingua, nós nun vamos apoyalo. Nun tien nada que ver cola cultura nin coles tradiciones d’Asturies que ye colo que ta d’alcuerdu VOX”.

Una conclusión que xeneró entovía más duldes a los periodistes presentes, qu’entrugaron a la conceyala si se diba a contratar o non finalmente a los artistes qu’empleguen la llingua asturiana na so actividá. “Lo que sía meyor pa Xixón y pa los xixoneses. VOX ta a favor de les tradiciones, ta a favor de los diferentes bables y el so usu en llibertá, VOX siempre ta en contra de la cooficialidá y VOX ta en contra col usu de la llingua. Y lo que llevamos diciendo tamién en campaña: tamos a favor de la cultura y tamién de toles tradiciones asturianes”, respondió, a lo que se-y volvió a insistir dende la prensa con que nun respondía a la pregunta.

“Tamos d’alcuerdu, a favor de toles tradiciones, lo que nun queremos ye tocar el conflictu de que se confunda otra vez la oficialidá colos espectáculos n’asturianu, porque si la promoción del espectáculu n’asturianu va ser una plataforma d’apoyu a la oficialidá de la llingua, nosotros nun vamos apoyalo. Lo demás, contrataráse tolo qu’hai, y les tradiciones y los cantes asturianos, porque eso va dientro de les tradiciones y la cultura d’Asturies”, retrucó nesta ocasión.

“Entiendo entós qué se va quedar namás colo folclórico”, apuntóse-y n’asturianu por parte d’Asturies.com: “Nosotros estudiaremos lo que va ser meyor pa Xixón y lo que va ser meyor pa los xixoneses”, dixo. “¿Entós artistes militantes pol asturianu nun van tener sitiu na programación de Xixón?”, a lo que respondió que “nosotros nun vamos dicir si ye militante o non, nosotros vamos conocer a eses persones y vamos conocer lo que nos van trayer eses actuaciones, y si ye bono pa Xixón por supuesto que se contratará”.

Sálvense los “cantantes de siempre”

Énte la insistencia d’otra periodista, repitió que “lo que nun queremos ye tocar el conflictu de que se confunda siempre colos espectáculos n’asturianu, pa que nun se vuelva a dicir otra vez falsedaes y pallabres vacíes”. “Si la promoción del espectáculu n’asturianu va ser una plataforma d’apoyu a la oficialidá de la llingua, nosotros nun vamos apoyalo. Agora, si esos cantantes n’asturianu nun pasa nada con ellos, porque son cantantes de siempre que tuvieron durante estos años pasaos, nun tienen por qué nun contratase. Ye que, de verdá, nun veo’l follón que se montó por too esto”, apuntó n’otra entruga nueva.

Al comenta-y que nun s’entendía a qué se refería colo de promocionar espectáculos, finó con que “si la promoción del espectáculu va ser una plataforma d’apoyu, qu’hai mensaxes d’ideoloxía de les izquierdes, evidentemente… Si non nun pasa nada y too va tar igual; les tradiciones y la cultura asturiana defenderánse como siempre se defendió”.

“Dende fuera suena a censura”, treslladó-y otra periodista, a lo que respondió con un “nun hai nada d’eso, eso dizlo vusté. Nosotros vamos ver lo que ye meyor pa Xixón y meyor pa los xixoneses. Nun hai nengún control nin nada que se-y paeza. Eso son temes de la izquierda, la xente quier facer munchu ruíu y facer dañu a VOX. Los que nun se pue facer ye llevantar falsos testimonios. Ésa ye la so visión”.

Por últimu, sobre la denuncia d’Andecha Astur énte Fiscalía por delitu d’odiu depués de les declaraciones sobre la contratación d’artistes asturianos feches na cadena de Xixón d’Onda Cero, dixo que “la mio valoración ye que ye ruíu”.

Na semeya, los dos ediles de VOX en Xixón, Álvarez Rouco y Óliver Suárez Rubio, que va presidir Divertia.