UNA presenta una moción na Casa Conceyu de Carreño contra'l maltratu animal nos festeyos

El conceyal d'Unidá Nacionalista Asturiana en Carreño, Xuan Rodríguez, presentó una moción na Casa Conceyu contra'l maltratu animal nos festeyos. Esta propuesta va ser debatida nel plenu d'esti xueves 30 de xunetu y nella pídese al gobiernu local que "nun autorice nengún actu qu'implique un maltratu animal", que "refuguen cualquier tipu de suvbención pa asociaciones que fomenten esti tipu d'actos" y que se declare a Carreño como "conceyu antitaurín".

Dende la formación nacionalista xustifiquen esta propuesta "pola permisibilidá de la Casa Conceyu con actos que suponen un evidente maltratu animal nes fiestes del conceyu, asina mesmo col oxetu de torgar la posible proliferación d'esti tipo d'espectáculos", polo que "recoyendo la demanda de la mayoría los vecinos y vecines de Carreño que refuguen esti tipu d'actos y piden nun atentar escontra los principios básicos de los drechos de los animales, presenta una moción pa que seya aprobada nel Plenu de la Casa Conceyu".

UNA considera que "la utilización d'animales n'espeutaculos "festivos" que faen un evidente maltratu del animal al tratar a ésti de mou antinatural o contrariu a les sos necesidades fisiolóxiques y etolóxiques, supón una vuelta atrás nos valores de la defensa de la dignidá de los los animales, faciendo que la sociedá retroceda a tiempos nos que la dignidá de los animales yera daqué que nun teniá nengun valor".

El conceyal nacionalista añade finalmente que "ye evidente que'l maltratu de los animales, especialmente los espectáculos taurinos son ayenos a la cultura tradicional asturiana. Los espectáculos taurinos sólo sobreviven de manera artificial n'Asturies poles grandes sovenciones de los estamentos públicos, pola publicidá que se da a estos espectáculos nos medios de comunicación, y pola conceición de "fiesta nacional" cola que Asturies, como otros territorios peninsulares, nun se siente identicao".