Cofiño, presidente de la Xunta Xeneral de la decimosegunda llexislatura

Salió escoyíu en primera votación col apoyu de la FSA, Convocatoria por Asturies y Foro.

Esta mañana celebróse la sesión constitutiva de la Xunta Xeneral, qu'encara la so decimosegunda llexislatura. Les diputaes y diputaos escoyeron como presidente del Parllamentu al socialista Juan Cofiño.

L'hasta agora vicepresidente del Gobiernu foi propuestu pol so grupu parllamentariu, mentes que'l PP presentó como candidatu a José Manuel Felgueres y VOX a Gonzalo Centeno. Nun fixo falta más qu'una votación, yá que Cofiño sumó mayoría absoluta, 23 diputaos, los 19 de la FSA, los 3 de Convocatoria por Asturies y el del únicu diputáu de Foro, Adrián Pumares, mentes que Podemos, como anunciara'l sábadu depués de la decisión del Conseyu Ciudadanu Autonómicu, astúvose.

El sustitutu de Marcelino Marcos va tar acompañáu na Mesa de la Xunta Xeneral, depués de les respeutives votaciones, por María Celia Fernández (FSA), como vicepresidenta; por José Agustín Cuervas-Mons (PP), como vicepresidente segundu; y por Delia Campomanes (Convocatoria por Asturies), que tuvo'l votu a favor de Podemos, y María del Pilar Fernández Pardo (PP), como secretaries. Una vegada constituyida la Xunta Xeneral, les 45 diputaes y diputaos prometieron y xuraron los sos cargos.

Na imaxe, Cofiño recibe l'aplausu de los sos compañeros depués de ganar la votación.