Avilés crea la Conceyalía de Deportes y Llingua

Va tar al frente David García Álvarez.

El pautu de gobiernu ente'l PSOE y Cambia Avilés lleva al Ayuntamientu d'Avilés a contar con una conceyalía específica pa la "promoción y difusión de la llingua" asturiana en manes de la coalición llocal de Podemos y Izquierda Xunida (IX) na que tamién va tar incluyíu l'área de deportes. Ésta va tener el nome ambiguu de Conceyalía de Deportes y Llingua.

El so responsable va ser García Álvarez, llicenciáu en Periodismu y Comunicación. Ex asesor de Tania González Peñas, dio'l pasu de liderar Podemos Avilés cuando dexó'l cargu de vocera del Círculu la europarllamentaria l'añu pasáu.

Cambia Avilés tamién va ocupar Festexos y Disciplina Urbanística (Sara Retuerto): Servicios Sociales y Cooperación (Agustín Medina); y Vivienda, Consumu y Memoria Democrática (Ana Solís). El restu, hasta les 12 conceyalíes, van pal partíu más votáu, el PSOE de l'alcaldesa Mariví Monteserín, que caltién les competencies de Policía Llocal: Desarrollu Urbanu y Económicu (Manuel Campa); Facienda, Turismu, Comerciu, Mocedá y Ciudá Dixital (Raquel Ruiz López); Emplegu y Educación (Juan Carlos Guerrero); Cultura (Yolanda Alonso); Servicios Urbanos, Movilidá y Mediu Ambiente (Pelayo García García); Mayores y Ciudá Saludable (Ana Suárez Guerra); Recursos Humanos (Noé Vega); y Igualdá (Lucía Fernández Ron).

Na imaxe, Monteserín ayeri na so intervención pa designar les competencies del so equipu de gobiernu. Semeya del Conceyu d'Avilés.