“Nel Conceyu de la Gaita queremos involucrar a tola base d’amantes de la gaita asturiana”, señala Esolá

Esti xueves va presentase en sociedá nel Real Instituto de Estudios Asturianos (RIDEA) el Conceyu de la Gaita, una asociación que pretende dinamizar el mundu de la gaita asturiana. “Queremos involucrar a tola base d’amantes de la música y la gaita asturiana”, espresa Tomás Esolá, secretariu y ún de los siete promotores.

En mayu foi cuando tomó forma un idea que se foi xestando “en conversaciones ente nosotros, cuando díbemos coinciendo en talleres o n’otros llugares”. Toos entendíen que “esto ta un poco apagáu, qu’hai desmotivación”, y sentíen que “fai falta comunidá” y que “nun hai ámbitos pa compartir”.

Asociaciase y dar el pasu pa camudar la situación foi la decisión que tomaron, siguiendo’l camín d’otros coleutivos previos qu’hebo nel pasáu, el primeru’l Conceyu de Gaiteros Asturianos, fundáu nel 1988. Nacía asina’l Conceyu de la Gaita, con una Xunta Direutiva Xestora conformada polos 7 impulsores, profesionales y aficionaos del instrumentu tradicional: Flavio Rodríguez Benito (presidente), Rodrigo Fernández Joglar (vicepresidente), Esteban González Corteguera (ayalgueru), Chus Solís (vocal), Pelayo Fernández (vocal), Luis Álvarez Pola (vocal) y el propiu Esolá (secretariu).

Ye un órganu temporal, porque ún de los primeros pasos ye l’entamu d’una Asamblea Xeneral Estraordinaria, convocada pal 6 de xunetu, pa ratificar la Xunta Direutiva o dir a eleiciones. “Queremos involucrar a tol mundu, que la base sía tola xente: escolinos, estudiantes, xente aficionao… Queremos involucrar a tola base d’amantes de la música y la gaita asturiana”, asegura Esolá.

“Depués del boom de los 80 y 90 d’esti instrumentu centenariu, herederu de la tradición y cultura popular, la gaita asturiana ta agora mui viva, pero nun momentu de ‘impasse’, horizontal. Hai xente que diz ta en declive n’escolinos… Ye un momentu nel que nun se sabe mui bien pa ónde va y entendemos ye importante intentar garrar el mandu y avanzar en base a consensos”, considera.

Actividaes previstes pal trimestre últimu del añu

A les 19 hores nel RIDEA, con accesu llibre pal públicu, Esolá y los sos compañeros van dar a conocer de manera pública un proyeutu pal que “tuvimos estudiando delles alternatives, asociaciones asemeyaes en otres partes del mundu” en busca de modelos qu’adoptar. Asina, van comunicar los oxetivos xenerales y específicos del Conceyu de la Gaita, los sos estatutos y una propuesta del primer programa añal d’actividaes.

Ésti, previstu pal trimestre últimu del añu, cuenta con sofitar conferencies y charres, la edición d’un Anuariu de la Gaita “qu’incluya toles actividaes del añu”, la puesta en marcha d’un portal web “nel que yá tamos trabayando” y homenaxes. Tamién ta previsto la collaboración y participación activa pa sofitar eventos yá esistentes como’l Festival Internacional de la Gaita que se celebra en Villaviciosa o’l Festival de Bandes de Gaites Villa de Candás, ente munchos otros.

“L’asocación quier servir de puntu d’alcuentru pa les persones interesaes nel conocimientu, difusión y práutica de la gaita asturiana a tolos niveles y nel so contestu históricu y cultural. Pa ello se quier afitar la xeneración de materiales y conteníos, asina como la realización d’actividaes dirixíes al estudiu y difusión del instrumentu énte’l conxuntu de la sociedá asturiana y tolos llugares onde ta presente nel esterior. L’enfoque ye holísticu, y quier tener en cuenta aspeutos como otros instrumentos tamién tradicionales n’Asturies (tambor y otres percusiones, curdión, gaita rabil, etc.) y la integración con otres artes (plástiques, escéniques, lliteratura, danza y baille, etc.)”, especifica la convocatoria.

En definitiva, “ser un llugar onde facer comuña, alendar actividaes y proyeutos y ufrir rempuestes a les necesidaes que tien la xente amante de la gaita anguaño, tanto profesionales como aficionaos”. Les persones interesaes n’asociase y collaborar con esti proyeutu pueden facelo al traviés de les redes sociales del Conceyu de la Gaita o del corréu electrónicu temporal conceyudelagaita@gmail.com.

Semeya cedida pol Conceyu de la Gaita.