Pumares va facer declaraciones el martes

El secretariu xeneral de Foro y únicu diputáu de la formación, Adrián Pumares, va dar una rueda de prensa esti martes, na que l'alcuerdu en Xixón que lleva a VOX a entrar nel gobiernu a cambiu del apoyu necesariu pa investir a Carmen Moriyón como alcaldesa será tema central. Esta cesión a la ultraderecha provocó reaiciones y dimisiones nel partíu, como les de José Suárez Arias-Cachero 'Felechosa', Inaciu Iglesias o Carlos Suárez.

Los trés emplegaron les redes sociales p’amosar la so disconformidá cola decisión tomada en Xixón que s’entamó a xestar depués del alcuerdu de gobiernu col PP del martes y que se concretó na tarde del vienres. Foi na mañana del sábadu cuando se confirmaría nel Plenu de constitución del Conceyu, pero hores enantes tanto’l vicesecretariu d'Estratexa y Comunicación como’l candidatu n’Uviéu yá dexara clara la so postura y amosara la so indignación.

Iglesias sería’l siguiente y toles miraes quedaríen fixes en Pumares. El diputáu, qu’agora tien el so perfil n’asturianu dafechu, retuitaría un mensaxe de Felechosa con una cubierta de ‘Contra el fascismo’ d’Umberto Echo que xubió’l miércoles y daría-y un ‘préstame’ a un mensaxe de Xosé Antón González Riaño, presidente de l’Academia de la Llingua Asturiana, del sábadu pela tarde na qu’afirmaba que “los derechos llingüísticos de los asturianos y asturianes afítense na Declaracion Univ. de los Derechos Humanos, na Const Española, na Carta Europea de les Llingües Minoritaries y nel Estatutu d'Autonomía. Una corporación municipal nun tien capacidá pa ‘conxelalos’ nin tarazalos”, pero nun fadría declaración pública nenguna.

Nesi sen, hai que recordar qu’ún de los puntos del alcuerdu en Xixón de Foro y VOX en ‘Política llingüística’ ye la “conxelación de les polítiques de promoción llingüística na so situación actual, ensin que puedan esistir incrementos de les partíes presupuestaries destinaes a les mesmes, direuta o indireutamente”.

Pumares va facer les sos primeres declaraciones mañana, cuando va convocar a los medios de comunicación, según confirmaron fontes de Foro a Asturies.com. Ye conocío que'l llavianés nun ta conforme cola decisión de Xixón y el miércoles viniente, día 28, ta programada xunta de la Comisión Direutiva na que l'asuntu va tar percima la mesa.

ACTUALIZACIÓN: Foro anunció finalmente la convocatoria pa mañana a les 10 hores na sala de prensa de la Xunta Xeneral baxo'l títulu "Adrián Pumares aborda los retos d'Asturies pa la llexislatura próxima".