“L’asturianismu de los años 70 ye parte de la tradición federalista y autonomista asturiana”, apunta David Guardado (1/3)

“Naz cola perceición de que lo que tán faciendo ye una cosa que nun tien tradición”, reflexonó David Guardado, autor de 'Nunca vencida. Una historia de la idea d'Asturies', nel alderique 'La idea d’Asturies: pasáu, presente y futuru' qu’entamó en xunu Grana y la Sociedá Cultural Xixonesa que recuperamos pa celebrar esti Día d'Asturies y que vamos presentar en trés pieces esta fin de selmana. El filólogu y académicu tuvo acompañáu polos historiadores José Luis Carmona y Margarita Fernández Mier, y Iris Díaz Trancho como moderadora.

La segunda planta de la Escuela de Comerciu, onde tien sede la Sociedá Cultural Xixonesa, acoyó esti actu entamáu en comuña cola asociación cultural nacida n’alcordanza de Yolanda Huergo, qu’atraxo a un bon piñu de xente al llugar. Una mesa redonda que pol so interés queremos presentar esti 8 de setiembre a los nuesos llectores y na que’l profesor d’Historia Moderna y Contemporánea na UNED Asturies y la caderalga d’Historia Medieval na Universidá d’Uviéu foron faciendo un repás históricu de manera cronolóxica centrándose nos puntos claves pa entender los discursos ellaboraos sobre Asturies pa finar nos momentos nos que más se centra’l títulu de Guardado, el sieglu XIX y XX.

“Esto nun ye un llibru d’historia d’Asturies”, introduxo l’autor, “nun toi falando de la historia d’Asturies nin pretendo esplicar lo que pasó o nun pasó en Cuadonga o nel 1808. Lo que pretendo facer ye una descripción de los discursos que xeneraron esos fechos, esos mitos o esos fitos; de tolo que se construyó ideolóxicamente alredor d’esos conceptos”. “En realidá sobre lo que pivota’l llibru ye nel sieglu XIX”, añadió darréu, “cuando se construyen los discursos nacionales, los discursos d’identidá, y esos discursos beben de tradiciones y articulen de dalguna manera lo que ye la idea sobre Asturies”.

D’igual forma quixo rescamplar que “el llibru ye una historia de la idea d’Asturies, pero en realidá de les idees d’Asturies, porque una de les coses que pretendía cuando lu escribí ye esplicar que munches de les coses que pensamos que siempre tuvieron ehí, que foron llugares comunes, que forman parte de la historia d’Asturies, son coses qu’apaecen nun determináu momentu con unes condiciones personales, ideolóxiques, materiales, contestuales…, que son les que condicionen qu’apaeza esi discursu y que depués se difunda al traviés principalmente de les élites o les clases dominantes”.

Nesi señ, añadió que “lo guapo de dir viendo a lo llargo de la historia los discursos, munches veces antagónicos, ye comprobar cómo se combinen y cómo los mesmos símbolos valen pa xustificar ideolóxicamente discursos que son contrapuestos”.

(VA CONTINUAR MAÑANA SÁBADU)

Na semeya, Díaz Trancho, Carmona, Guardado y Fernández Mier.