Víctor Suárez y Inaciu Galán van viaxar a Portugal pa falar sobre l’asturianu na Universidade do Porto

El ‘Porto Meeting. Encontro de comunidades Wikimedia em línguas minoritárias’ que va acoyer la universidá de la ciudá portuguesa esta fin de selmana va contar cola presencia d’espertos en llingües minorizaes y en wikipedies nestos idiomes. Ún sobre los que se va poner el focu va ser l’asturianu, con conferencies d’Inaciu Galán y Víctor Suárez.

El periodista xixonés va ser el primeru de los dos n’intervenir, el vienres a les 19.20, hora llocal, cola conferencia ‘Asturian, a lenguage on the road to official status (L'asturianu, una llingua caminando hacia la oficialidá)’, xusto depués d’una sobre la situación del mirandés y enantes d’otra sobre la diversidá llingüística n’Estremaúra. Nesta comunicación nel Anfiteatru 2 de la Faculdade de Letras da Universidade do Porto, abierta al públicu xeneral, Galán va facer un percorríu rápidu pela historia y les circunstancies actuales del asturianu.

Yá de sábadu, Suárez va encargase d’abrir la xornada a les 9.30 hores cola ponencia ‘State of the Wiki: Asturian (Estáu de la Wiki: asturianu)’, na que va esplicar la situación que vive anguaño la nuesa wikipedia, con niveles altos de participación y entraes que l’asitien nun puestu destacáu del ranking de llingües con Wikipedia magar la falta d'oficialidá del idioma. Nesti casu, la intervención va ser zarrada, con accesu namás pa los representantes de les diferentes wikipedies presentes en Porto, esto ye, de la catalana, la vasca, la estremeña, la gallega, la mirandesa y la lombarda, espertu que tamién va esponer el llabor fechu n’otres llingües minorizaes d’Italia.

Na semeya, Faculdade de Letras da Universidade do Porto.