Grana y la Sociedá Cultural Xixonesa conviden a reflexonar sobre la idea d'Asturies

La espublización de 'Nunca vencida. Una historia de la idea d'Asturies' anima a entamar una mesa redonda col autor David Guardado y José Luis Carmona y Margarita Fernández Mier.

"Cómo pensamos Asturies, qué pallabres, qué valores lleven operando alrededor de la idea d’Asturies a lo llargo de la historia, y quién y por qué los punxo ehí" son los aspeutos nos que quier afondar l'asociación cultural Grana, n'Alcordanza de Yolanda Huergo y la Sociedá Cultural Xixonesa con esti alderique baxo'l nome de 'La idea d’Asturies: pasáu, presente y futuru'. Ésta va tar moderada pola presidenta del primer coleutivu, Iris Díaz Trancho.

Xunto con Guardado van tar Carmona, profesor d’Historia Moderna y Contemporánea na UNED Asturies, y Fernández Mier, caderalga d’Historia Medieval na Universidá d’Uviéu. La cita ye mañana, a les 19 hores, na segunda planta de la Escuela de Comerciu.