Uviéu nun apaez nel quilómetru 0 de la Puerta del Sol (Oviedo sí)

Ye la única capital, xunto con València, que nun s'escribe col topónimu oficial na rosa de los vientos instalada onde la placa.

Les obres de reforma de Puerta del Sol llevaron al Ayuntamiento de Madrid a facer cambios na zona onde ta instalada la placa del quilómetru 0, onde nacen les carreteres radiales del Estáu. Asina, pol so tamañu n'ocasiones desapercibida, pasa agora a ser centru d'una figura mayor que llama l'atención a los munchos llocales y visitantes que pasen pel llugar.

Pa ello diseñóse una rosa de los vientos nos qu'apaecen los nomes de les diferentes capitales de provincia y les ciudaes autónomes. Nella pue lleese Pontevedra, Ourense, Zamora, A Coruña, Lugo, León, Valladolid, Segovia, Oviedo..., esto ye tolos topónimos oficiales sacante'l de la ciudá asturiana.

Un casu que namái se repite con València, al emplegar 'Valencia', lo que llevó al so alcalde Joan Ribó a pidir oficialmente al madrilanu José Luis Almeida a una modificación que'l popular nun paez dispuestu a facer. Inclusive, llegó a dicir que taba bien puestu magar nun llevar la tilde que marca l'acentu abiertu.

Dende'l Conceyu d'Uviéu, por contra, nun hebo quexa nenguna pa qu'apaeciera la forma oficial Oviedo/Uviéu. Ye Iniciativa pol Asturianu la única entidá en dar a conocer esta situación y en reclamar el cambiu al Ayuntamiento de Madrid pa respetar la llegalidá que marca'l "Decretu 14/2019, de 13 de marzu" qu'afita los topónimos oficiales del conceyu.