Reciella reclama al Gobiernu próximu "un compromisu claru y concretu cola tresmisión del asturianu"

La organización señala como'l fechu más sangrín l'ausencia del idioma nel currículum d'Infantil, "el periodu más importante pa la tresmisión d'una llingua", aprobáu nel 2022.

'Reciella. Families pol Asturianu' ta acabante d'asoleyar un comunicáu nel que reclama al Gobiernu que salga de les urnes el 28-M "un compromisu claru y concretu cola tresmisión del asturianu". "Pidimos que los próximos cuatro años valgan pa dar un reblagu nes polítiques qu’aseguren el caltenimientu del asturianu como una llingua viva que se tresmita ente xeneraciones", apunta esti coleutivu, que llamenta que "anque hai una mayoría parllamentaria a favor de la oficialidá y una práctica unanimidá na defensa de la Llei d’Usu, a la que tolos partíos (los que tán a favor de la oficialidá y los que non) se remiten como puntu de llegada o de partida, la realidá ye qu’esta llei nunca se cumplió y nun se cumple añguaño anque s’aprobó en 1998, esto ye, hai más de 25 años".

Nel ámbitu nel que trabaya Reciella "l’exemplu más sangrín ye’l de la educación, na que l’asturianu ta ausente na etapa infantil, el periodu más importante pa la tresmisión d’una llingua y, lo que ye más grave, con una ausencia que consagró, contra la lletra y l’espíritu de la Llei d’Usu, un currículum aprobáu en 2022 que non sólo nun supunxo un avance nesta etapa, sinón qu’afitó un retrocesu que nos llevó a la situación d’hai más de trés décades". L'ausencia de conteníos audiovisuales n'asturianu "que permitan que la nuestra reciella pueda acceder a programación y conteníos na so llingua de forma planificada y permanente" ye otru exemplu que pon la organización pa visualizar la llaceriosa situación que viven les families pa garantizar dicha tresmisión del idioma.

"Énte esta situación, independientemente del procesu de reforma estatutaria, dende Reciella pidimos a los partíos que defenden el nuestru idioma y patrimoniu un compromisu firme y decidíu cola tresmisión interxeneracional del asturianu, que se concrete na próxima llexislatura nun plan con oxetivos a curtiu, mediu y llargu plazu, y que plantegue como prioridá aumentar el númberu de falantes y l’usu del asturianu nel ámbitu familiar", rescamplen, "porque la supervivencia d’un idioma nun s’asegura con midíes aisllaes o declaraciones xenériques, como les que vemos nos programes electorales, sinón cola incorporación de la recuperación llingüística como un oxetivu social compartíu, al que se-y dediquen recursos: normalizando l’usu del asturianu y convirtiendo, na práctica y con una política midible, visible y de la que veamos los resultaos".

Nesi sen, l'asociación de families ufre la so "opinión, conocimientu y esperiencia al Gobiernu que salga de les urnes el próximu domingo pa trabayar nesta llinia nos próximos cuatro años".

Na semeya, un momentu del últimu Día de la Reciella, el novenu, xornada que celebra'l coleutivu n'ochobre nel Muséu del Pueblu d'Asturies con actividaes diverses n'asturianu de baldre a lo llargo de tol día.