Los lletreros nuevos instalaos na N-634 al so pasu per Piloña nun respeten la toponimia oficial

‘Oviedo’, ‘Infiesto’ y ‘Campo de Caso’, topónimos derogaos nel 2019, 2008 y 2007, de manera respeutiva, son los emplegaos nos lletreros nuevos instalaos pol Ministeriu de Tresportes, Movilidá y Axenda Urbana na N-634 al so pasu per Piloña. La Xunta pola Defensa de la Llingua Asturiana (XDLA) reclama al Gobiernu una quexa formal por esti incumplimientu de la única toponimia oficial, l’asturiana.

La billingüe Oviedo/Uviéu, L’Infiestu y El Campu son les úniques formes válides y, poro, les que deberían apaecer na cartelería oficial. Esta situación ye pa la XDLA “otru despreciu más de la Demarcación de Carreteres n'Asturies, de la Delegación del Gobiernu y del conxuntu del Executivu central hacia al patrimoniu llingüísticu asturianu”.

Critica tamién la “complicidá del Gobiernu d'Asturies, que s'enchipa de llograr que'l Ministeriu de Cultura publique dalgún cartelín n'asturianu xunto al restu d'idiomes del Estáu pol Día del Llibru, pero qu'asiente y agacha la cabeza mentes que dende Madrid refuguen cuestiones básiques pa la normalización como la especialidá docente d'asturianu o l'usu de la toponimia oficial d'esta tierra”. Por esti motivu reclama al Executivu asturianu, “tanto dende la Dirección Xeneral de Política Llingüística como de la Comisión de Cartografia del Principáu y de la Viceconseyería d'Infraestructures Movilidá y Territoriu, una quexa formal a la Demarcación de Carreteres, a la delegada del Gobiernu n'Asturies, Delia Losa, y a la ministra de Tresportes, Raquel Sánchez, énte esti despreciu nuevu a la llexislación asturiana y, en conxuntu, a la cultura y la llingua d'Asturies”.