Ástura reconoz la figura de Rafael del Riego na charra d'esti mes

Va ponela l'historiador Faustino Zapico, que'l xueves va tar n'El Remediu pa participar n'otra conferencia, nesti casu sobre'l 25 de mayu.

'Rafael del Riego, el mitu que comió al home' ye'l nome de la conferencia mensual d'Ástura sobre cultura asturiana nel Atenéu Obreru de Xixón. "Tien como oxetivu recordar a Rafael del Riego con motivu del 200 aniversariu de la so execución pol rei absolutista Fernando VII. Del Riego yera un militar asturianu (Tuña, 1784-Madrid, 1823) que se convirtió n’arquetipu del lliberalismu y de la llucha contra l’absolutismu desque'l 1 de xineru de 1820 promovió una sublevación militar en Las Cabezas de San Juan en defensa de la Constitución", apunten dende l'asociación.

"Ástura quier promover el reconocimientu d’otru personaxe asturianu fundamental del sieglu XIX, que lluchó siempres poles llibertaes civiles y polítiques na España del so tiempu, tratando de facer rescamplar al home nel so contestu históricu perriba de la mitoloxía que lu arrodia, pa poder velu con claridá na so dimensión humana y política", sigue esti coleutivu, que convida a Zapico pa ello. La cita va ser mañana, a les 19 hores, nel llar del Atenéu nel segundu pisu de la Escuela de Comerciu, con entrada llibre.

Nel CSA L'Apiaderu

Nun va ser la única conferencia del mierense esta selmana, yá que'l xueves va tar presente nel conceyu de Nava, nel Centru Social Autoxestionáu L'Apiaderu, n'El Remediu, pa falar del 25 de mayu. Va ser a les 19 hores y la charra lleva'l nome de '25 de mayu 1808. Fechos y llectures'.