“Siento que se visibiliza y reconoz la voz grupal de les muyeres escritores de la mio xeneración y la de les que vinieron depués”, espresa Álvarez

Depués de que lu llevara nes dos primeres ediciones Xuan Bello y Xuan Xosé Sánchez Vicente, Lourdes Álvarez convirtióse esti XLIV Día de les Lletres Asturiana na primer muyer en recibir el Premiu Nacional de Lliteratura Asturiana. “Atópome mui feliz porque siento que con él tamién se visibiliza y reconoz la voz grupal de les muyeres escritores de la mio xeneración y la de les que vinieron depués”, señaló.

“Aportamos al panorama lliterariu asturianu una espresión estética diferente, porque diferente ye la nuestra mirada y la forma nuestra de tar nel mundu y d’interpretalu”, siguió la de La Güeria d’Urbiés nun discursu na que confesó que’l premiu “fízome reflexonar sobre’l procesu d’escribir, situame na posición d’aquella nena de seis o siete años que los domingos d’iviernu, con vagar, entreteníase escribiendo con so padre sobre paisaxes o vivencies conocíes polos dos y que depués lleíemos n’alto. Pasábemos guapamente’l tiempu, poniendo palabra ente palabra la interpretación d’una realidá que se tresfiguraba al escribila. Eso paecíame maravioso”.

“El poder tresformador de la palabra, el descubrimientu de la música que naz de la mesma y una promesa implícita, fecha a les persones que me la tresmitieron, de custodiala y vivir nella como elles lo fixeron, amás del mio inconformismu vital, creo que son les causes de que yo seya poeta nesta llingua nuestra, acorralada, como Xosé Bolado dicía nel poema ‘Tarde oriental’”, apuntó Álvarez. Los acontecimientos que vivió na so mocedá, la “transición política y la reivindicación del plurillingüismu nel estáu español, un derechu arrincáu, como tantos otros, pola dictadura de la que tábemos tratando de salir”, tamién ayudaron, dixo darréu.

Recordó entós que, con 16 años, nel 1977, viera “per vez primera testos escritos n’asturianu y un poema que me emocionó de una manera desconocida hasta entós, ‘Tedium vitae’ de José Benito Alvarez-Buylla”, na revista ‘Del aráu a la pluma’. “Nel mesmu añu, en Turón, alredor de Nel Amaro y la Casa de la Xuventú que dirixía Reyes Amor, na revista ‘Cuélebre Literario’, había un espaciu pa los testos n’asturianu y acoyía los mios poemes primerizos”, comentó.

Años universitarios

Los años d’universidá “con persones que como yo teníemos inquietúes lliteries y procedíemos d’entornos rurales nos que la llingua d’usu yera l’asturiana: Esther Prieto, primero, y más tarde Antón García, Xuan Bello, Berta Piñán, Ignaciu Llope, Xilberto Llano, Xulio Vixil…”, marcaron tamién a la escritora. “Foi un tiempu ilusionáu de compartir opiniones, llectures, tertulies, publicaciones en revistes y oyer na radio cantar n’asturianu; del Estatutu d’Autonomía p’Asturies; de la creación de l’Academia de la Llingua Asturiana; de la celebración de la primer xunta d’escritores y de la publicación de la ‘Antoloxía del Surdimientu’... Foi un tiempu de construcción nel que punximos lo meyor de nós, la fuerza de la mocedá, p’ayudar na cimentación de la cultura y de la llingua asturianes”, rellató.

La espublización de l’antoloxía fecha por Bolado “foi especialmente importante pa mio. Veme incluyida nella fixo que yo mesma me tomare en serio y empezara a escribir con mayor constancia y dedicación, que me comprometiera cola palabra, qu’atendiera a les preguntes que me facía y tratara de da-yos respuesta al traviés de la poesía, la que lleía y la que fui escribiendo porque quería, porque descubrí que me completaba. Esi foi’l momentu nel que me comprometí cola palabra, cola so materia lluminosa al facela poesía”.

Por último, Álvarez quixo agradecer “a los llectores que ficieron y faen posible la existencia de la poesía, que de mano namás escribo pa mi; a los mios padres que me dieron el Vierbu, la palabra heredada; y a Xosé Bolado, mentor y amigu al que voi querer siempre. Téngolos mui en cuenta y a ellos quiero dedica-yos esti premiu”. Zarró la intervención cola llectura de ‘A los cinco años conocí la muerte’, “últimu poema que compartía en xineru de 2021 con Xosé”.