Asturies festexa’l XLIV Día de les Lletres Asturianes

Esti vienres tien llugar la gran celebración alredor de la nuesa lliteratura: festéxase’l Día de les Lletres Asturies. L’actu institucional de l’Academia de la Llingua Asturiana (ALLA) torna al Campoamor n’horariu vespertín pa reconocer a Lourdes Álvarez y recibir a David Guardado, mentes que 57 llibreríes ponen un 10 por cientu de descuentu a la merca de llibros n’asturianu y gallego-asturiano.

Les 19 hores ye l’horariu nuevu del actu del Campoamor, que va poder siguise un añu más en direuto per TPA. Los académicos, col so presidente Xosé Antón González Riaño al frente, van facer entrega nesta ocasión a la poeta Álvarez la medaya conmemorativa pol III Premiu Nacional de Lliteratura Asturiana pola so trayeutoria.

Amás, Guardado, fundador d’Asturies.com xunto con Fernando de la Fuente, va ser recibíu como académicu de númberu de la institución. Completaráse l’actu col esperáu discursu de González Riaño, cola llectura de poemes de la premiada Álvarez y con intervenciones musicales, rescamplando la final de Silvia Quesada.

El güeyu nesta xornada, amás de nel escenariu, va tar nel públicu, al ser añu d’eleiciones. El 28 d’esti mes hai cita coles urnes y les cámares van buscar la presencia de candidatos nel actu.

Por parte del Gobiernu ta confirmada l’asistencia del presidente, que se presenta a la reeleición, Adrián Barbón, xunto coles conseyeres de Cultura, Política Llingüística y Turismu, y Facienda, Berta Piñán y Ana Cárcaba, de manera respeutiva. Va acompañalos el direutor xeneral de Política Llingüística, Antón García.

Día del Libru y Discu n’Asturianu

57 llibreríes del país participen na celebración del Día de les Lletres Asturianes ufriendo güei un 10 por cientu de descuentu pola merca de llibros y discos n’asturianu y gallego-asturiano. Los veceros van recibir amás de baldre’l llibru conmemorativu de la XLIV Selmana de les Lletres Asturianes, ‘Xosé Bolado. Fálame duce’, y nel casu del occidente, el cómic ‘Gladius’, del humorista gráficu Ernesto García del Castillo ‘Neto’.

Los comercios participantes son Aldaba Regalos, Aldebarán, Antares, Casa del Libro (tamién disponen del llibru conmemorativu en gallego-asturiano 'Gladius' del humorista gráficu Ernesto García del Castillo ‘Neto’), Cervantes (tamién en gallego-asturiano), Chemi, Diocesana, Elías, Esfera, Garluc, Hangar Rebelde, Maribel, Pasa Página, Pintar-pintar (tamién en gallego-asturiano), Polledo, Puntos, Reconquista, San Pablo, II Milenio y Trabe (tamién en gallego-asturiano), n’Uviéu; Acuarel, De Bolsillo, El Bosque de la Maga Colibrí, La Buena Letra, Central, Clarín, La Habitación Propia, Identidad Secreta, Paradiso, La Revoltosa, Roy, Mundo Sonoro y Musicasturiana.com, en Xixón; Casona, Clarín, Víctor Núñez y Elepé Producciones, n’Avilés; Disco 55, La Llocura, La Pilarica y La Torre, en Mieres; Casa Pérez, Patefa y San Pedro, n’A Veiga; Treito, en Cangas del Narcea; Alfonso, n’El Franco; Las Dos Vías, en Grau; Muséu de la Sidra, en Nava; La Semeya, en Noreña; Gestión, en Parres; Rima, en Piloña; Sol, en Samartín del Rei Aurelio; y Fnac, La Chimenea y Naredo, en Siero.

Amás, nesta xornada, el Gobiernu va dar a conocer a los ganadores de los certámenes escolares a les 14 hores.

Manifestación y cambiu d’horariu

La Xunta pola Defensa de la Llingua Asturiana tresllada a mañana la tradicional manifestación pol Día de les Lletres Asturianes en demanda de la oficialidá del asturianu y del gallego-asturiano. Va tener salida a les 12 hores de la Estación del Norte (Renfe) y final na Escandalera, onde va haber llectura del manifiestu por parte de l’actriz Natalia Suárez Ríos y actuaciones musicales d’Ún de Grao, Alicia Álvarez y David Varela, y Misiva.

Otra manera, pa zarrar les actividaes de la Selmana de les Lletres Asturianes, nel Piñole los poetes más mozos van participar nel alcuentru ‘Fueyes de color infinitu’, actividá prevista nun primer momentu a les 12 hores pero que se tresllada a la tarde, a les 17.30, pa nun coincidir cola manifestación. El públicu va poder disfrutar de les reflexones y los poemes d’Aida Escudero, María Fernández Abril, Alejandro Fernández-Osorio, María García Díaz, Xaime Martínez y Pablo X. Suárez, y el grupu Tierra y Eco, compuestu por Ana Lamela y Carmen Miranda, va poner música en direuto alredor de la obra de Xosé Bolado.