“‘Palabres blanques’ regala volver a asomase a esi universu llenu d’intelixencia y calidoscópicu que yera Bolado”, diz Piñán

El segundu llibru que nos dexa esta Selmana de les Lletres Asturianes dedicada a Xosé Bolado, “un activista de la lliteratura asturiana” apuntó Marta Mori, ye ‘Palabres blanques. Testos d’Historia y Crítica lliteraria (Esbilla)’. La conseyera Berta Piñán apuntó sobre la obra que regala “la posibilidá de volver a asomase a esi universu llenu d’intelixencia y calidoscópicu" del homenaxáu.

Les dos escritores, coordinadora tamién de la publicación y responsable de Cultura, Política Llingüística y Turismu, de manera respeutiva, presentaron el llibru editáu por Trea la mañana del sábadu nel xixonés Muséu Nicanor Piñole, actu nel que tuvieron acompañaes por Xosé Ramón Iglesias Cueva. Yera’l segundu de la Selmana de les Lletres Asturianes, pa la que tamién s’editó ‘Xosé Bolado. Fálame duce’, que se dio a conocer el día enantes y que se va repartir de baldre’l vienres, Día de les Lletres Asturianes, cola merca d’un discu o llibru n’asturianu nes 57 llibreríes que participen na xornada.

Piñán encargóse d’abrir la intervención énte’l bastante públicu asistente, lo qu’obligó a sacar más sielles a les trabayadores de la instalación. Principió rescamplando a Bolado como una “figura imprescindible pa presentar la historia de la creación, la edición y la crítica lliteraria de la lliteratura asturiana nel últimu mediu sieglu” y señaló que “ye motivu d’arguyu que la obra y la figura de Xosé Bolado cobre’l protagonismu que merez nesta Selmana de les Lletres, secundaes amás por una fola de respetu y de ciñu que lo empapa too y fai que garre un sentíu especial, como tolo que tenía que ver con Xosé Bolado”.

Esplicó que ‘Palabres blanques’ se centra “nel llabor que Bolado desenvolvió como estudiosu y como críticu, y que naquel momentu resultó fundamental pa poner los cimientos y pa dar cuerpu y proteición a la llírica, sobre too pa la llírica en llingua asturiana”. “El sentir unánime ye trazar recuerdu d’un home discretu que conxugaba con maestría la firmeza de l’amabilidá, y que tuvo una inquietú incesante y un compromisu tamién inquebrantable col tiempu que-y tocó vivir. Too ello, como bien sabemos, dio-y una vida rica n’esperiencies, rica en conocimientu, y amigos y amigues. Porque na esencia de Xosé Bolado taba siempre esi compartir y esi eternu y maraviyosu conversar”, añadió.

“Quiero resaltar equí’l trabayu esceicional de Marta Mori na coordinación de la edición de ‘Palabres blaques’ y tamién ‘Fálame duce’. El resultáu dexa bien claru’l respetu y el cariñu, y el cuidáu infinitu col que Marta llevó a cabo esti trabayu”, emponderó Piñá, que tamién tuvo pallabres p’Ana Lamela, otra persona que s’encargó na coordinación d’esta edición de la Selmana de les Lletres.

La de Cañu finó la so intervención calificando “la pulcritú de Bolado como filólogu y editor” de “innegable” y rescamplando “la contribución tan grande que fixo a la proyección y al espoxigue de la lliteratura n’asturianu. Él mostró con una voz culturizada, con una voz llena d’argumentos, que la reivindicación del asturianu como llingua materna y como llingua de comunicación llevaba arreyada un caudal de talentu y de sensibilidá creativa que la sociedá asturiana nun podía inorar. Y qu’atopó’l so espaciu gracies a voces como la del propiu Xosé”.

Un güecu de la so actividá “que nun podría quedar inútil”

Mori encargóse d’afondar nel llibru, esplicando que “nos últimos años presentáronse trés antoloxíes de la poesía de Xosé Bolado: una fecha pola Academia de la Llingua Asturiana, otra fecha por Esther Muntañola que ye billingüe y otra fecha pola editorial Impronta íntegramente n’asturianu. Por eso, cuando nos plantegamos cuáles deben ser les actividaes que díbemos facer pa la Selmana de les Lletres Asturianes paeciónos qu’había un güecu de la so actividá que yera fundamental y que nun podría quedar inútil y ye’l so trabayu como críticu lliterariu y como investigador d’historia lliteraria”.

Darréu refirióse a Bolado como “un activista de la lliteratura asturiana” y como “una persona d’una interactividá que, si me permite la espresión, metía mieu. Dexábanos pequeños y pequeñes a los demás. Porque amás d’esto sabemos que siempre tuvo comprometíu políticamente, sindicalmente… Nenguna de les coses que facía taba desprovista de compromisu”.

“‘Palabres blanques’ ye una esbilla, porque’l númberu de testos de crítica lliteraria y historia lliteraria que salió de Xosé Bolado ye incontable”, siguió Mori, qu’apuntó que busco “que los testos foran los más significativos posibles”. Asina, apuntó que “hai un testu, por exemplu, dedicáu al teatru- Bolado escribió dalgo sobre teatru, más sobre poesía, pero dalgo sobre teatru, pero él tenía les idees mui clares: él ye partidariu de refugar la vía del teatru costumista asturianu, del teatru popular, que ye una opción, porque sabemos que güei la Compañía Asturiana de Comedias sigue activa y hai otra visión, hai otra manera d’enfocar esta cuestión, pero él consideraba, a lo menos nos años 80, que yera imprescindible dexar atrás eses formes teatrales y sustituyiles por otres, vanguardistes, a poder ser, pa poder dar una visión de la producción cultural n’asturiana dafechamente opuesta a la que tenía la xente depués del franquismu”.

Tamién hai sitiu p’artículos críticos sobre dos autores que Mori ve como significativos: María Teresa González y Andrés Solar. “Tamos falando de dos autores que va tiempu que nos dexaron, pero que yeren autores que destacaben nel so momentu pola so frescura y pola so calidá siendo como yeren autodidactes”, rescamplando tamién que se trataben de “escritores obreros”.

“Cualidaes visionaries”

“Depués Bolado escribió tamién y muncho sobre poesía. Él lleía absolutamente tolo que salía n’asturianu, sobre too depués de que se puso al frente de la revista ‘Lliteratura’ de l’Academia de la Llingua Asturiana, de la que yera direutor”, apuntó. “Y munches veces enseñaba cualidaes visionaries, porque sabía ver nun poeta que tenía escrito unos versos nuna revista si había madera d’escritor o escritora. Siempre había sitiu na revista ‘Lliteratura’ pa la poesía nueva si yera poesía de calidá, nun importaba si escribieres un poemariu o trés poemes nuna revista”, amplió.

La coordinadora tamién recordó que “al mesmu tiempu siempre tenía una parte pa facer balance de lo que se llevaba escritu hasta’l momentu. Asina, por exemplu, nos sos artículos reivindica la poesía de Xosé Manuel Valdés Costales, al que-y diz que nun se-y fizo’l casu que se-y tenía que facer, seguramente porque la crítica y los medios tienden a facer siempre más casu a la poesía más nueva, a los que van llegando más nuevos”.

Bolado punxo enfotu d’igual forma en “reivindicar la posición que teníen figures como Manuel Asur, por exemplu, del que tol mundu conoz les lletres de los cantares de Nuberu y que por tanto tol mundu conoz como un autor de poesía de combate, pero que tien una poesía muncho más intimista y casi podíamos dicir espiritual. Y ye la qu’él recitaba y reivindicaba, y cuando díbemos a clase de Lliteratura con él, los que tuvimos esa suerte, yera los poemes que nos ponía. Poníanos tamién la poesía más intimista de Xuan Xosé Sánchez Vicente”, una forma de “poner el focu, dar lluz, a autores que taben siendo inxustamente olvidaos o sobre les que taben empezando a formase un clixé, que ye una cosa que pasa munches veces cola crítica lliteraria”.

Na parte de la crítica lliteraria afondó darréu Iglesias Cueva, información a la que pues acceder calcando equí.

Na semeya, Mori, Piñán y Iglesias Cueva.