La lliteratura asturiana despierta interés na capital británica

El traductor inglés a la llingua asturiana Robin Munby, que tamién va participar nun actu nel Instituto Cervantes, representó al idioma nuna conferencia de The London Book Fair.

La mesa redonda ‘Less Translated Literatures from Spain: Asturian, Basque, Galician» (Lliteratures españoles menos traducíes: asturianu, vascu, gallegu)’ despertó interés ente los asistentes a la importante feria del llibru de Londres. El 'Literary Translation Centre' acoyó dientro de la programación oficial del certame la primera de les dos cites previstes na capital británica estos díes con protagonismu de la lliteratura asturiana.

El Gobiernu apoya la presencia de Munby, inglés residente en Madrid que tien feches tornes inédites del so idioma al asturianu, dientro de la collaboración col ‘Changing the Translation Landscape from Multilingual Spain: Cultural Diplomacy and the UK Publishing Industry (Cambiar el paisaxe de la traducción de la España multillingüe: diplomacia cultural y la industria editorial británica)’, un proyeutu académicu de la University of Warwick dirixíu por Olga Castro. Xunto a él, y la propia profesora, tamién participaron na mesa redonda l'autor y traductor gallegu Xesús Fraga, la tamién traductora Olivia Hellewel y la editora de Parthian Books, Susie Wilde.

Testos de Menéndez y Texón

El segundu eventu va celebrase mañana col nome ‘Riveting Writing from Multilingual Spain. Translators from Asturian, Basque, Catalan, Galician and Spanish (Lliteratura apasionante de la España multillingüe. Traductores del asturianu, vascu, catalán, gallegu y español)’ y va servir de presentación del númberu nuevu de la revista ‘The Riveter’, editada por European Literature Network, qu’inclúi tornes al inglés de testos en llingua asturiana de Pablo Texón y Claudia Elena Menéndez, amás d’un artículu de Munby qu’ufierta la so perspeutiva sobre la traducción ente estos idiomes. Va ser nel Instituto Cervantes London, dientro del alcuerdu robláu recién ente la institución y el Gobiernu pa difundir el nuesu idioma pel mundu, a les 15 hores –16 n'Asturies–.

Na semeya, un momentu de la mesa redonda celebrada nel marcu The London Book Fair, con Munby a la derecha.