La vuelta de los toros a Xixón: el compromisu eleutoral de Foro

Foro convierte nun compromisu eleutoral la vuelta de los toros a Xixón. Jesús Martínez Salvador confirmólo depués d’un aconceyamientu cola Federación de Peñas Taurinas del Principado de Asturias y anunció que’l partíu tien en marcha un estudiu pa que’l regresu de la Feria de Begoña sía esti mesmu branu con una pequeña mengua d'aforu.

Asturies, que ta llibre d’eventos taurinos nestos momentos, sacante la iniciativa privada de Benia del añu pasáu nuna plaza portátil instalada pa la ocasión, volvería a contar con una feria, la única que se venía celebrando nes décades últimes, nel casu de que Foro llegara a l’Alcaldía. La formación que presenta a la ex primer edil Carmen Moriyón como candidata apuesta fuerte pola vuelta d’estos ‘festexos’ depués de que nel 2022 nun se celebraran.

La situación na que ta la plaza de toros, con riesgu de fundimientu del ‘tendido’ según un informe valoráu pol equipu de gobiernu actual, llevó a cancelar la prórroga del contratu cola empresa Circuitos Taurinos, que venía xestionando la Feria de Begoña. El númberu 2 de la llista eleutoral de Foro y voceru municipal asegura que se podría intervenir pa celebrala n’agostu otra vuelta con una pequeña mengua d’aforu.

Na semeya, un 'paseíllo' de la última Feria de Begoña, celebrada nel 2021.