Una conferencia va tocar el tema de los neños robaos nel franquismu

Va ponela la madrilana Soledad Luque, presidenta de l'Asociación 'Todos los niños robados son también mis niños'.

La Comuna d'Asturies, integrante de la Coordinadora Estatal d'Apoyu a la Querella Arxentina (CEAQUA), nun quier dexar atrás ún de los aspeutos más prietos del franquismu, munches vegaes escacíu: el robu de neñes y neños al nacer. Madres y críos, víctimes de la dictadura, a los qu'esti coleutivu quier dedicar una conferencia llueu de que'l Congresu decidiera'l 28 de febreru tornar tramitar la Llei de Neños Robaos depués de tar paralizada dos años y mediu.

Pa ello conviden a Luque, profesora de la Universidad Carlos III que dende'l 2011 ta enfotada na busca del so mellizu, Francisco, dau por muertu pero presuntamente robáu. Depués de que los xulgaos españoles archivaren la denuncia, decidióse a organizar una asociación, 'Todos los niños robados son también mis niños, y a incorporar el so casu y otros más de desapaiciones a la Querella Arxentina, amás de trabayar xunto a CEAQUA pa que saliera alantre la citada Llei de Neños Robaos.

La charra va tener llugar esta tarde, a les 19 hores, na zona común de la segunda planta de la Escuela de Comerciu cola collaboración del Atenéu Obreru de Xixón, que tien el so llar social nesi espaciu, baxo'l nome 'Les víctimes del robu de neños: les olvidaes del franquismu'. Una actividá dedicada a les muyeres nesta selmana especial pol 8-M, que, amás d'acabar na cárcel, nel esiliu o nuna fuesa, tamién "foron víctimes del franquismu pol fechu de ser muyeres y la represión que sufrieron incluye el robu de los sos fíos, circunstancia que tamién tien que formar parte de la memoria democrática d’esti país. Miles de neños y neñes foron víctimes d’apropiación, desapaición forciada y/o sustitución d’identidá en tola etapa franquista y inclusive depués".

Na semeya, Luque, nel centru, xunto con miembros de coleutivos de denuncia de casos de neños robaos, el 7 de febreru al facer entrega nel Congresu de les 81.000 firmes recoyíes pa reclamar l'aprobación de la Llei de Neños Robaos, nesi momentu paralizada.