El concursu lliterariu 'Ensin muyeres nun hai idiomes' repite

Convócase la segunda edición del certame coincidiendo coles celebraciones pol 8-M.

Iniciativa pol Asturianu ta acabante de convocar el II 'Ensin muyeres nun hai idiomes', concursu lliterariu que busca "reflexonar sobre la importante figura de la muyer como pegoyu de quien deprendimos la nuesa llingua materna, fixándonos especialmente nesi idioma nel que viven, sienten y nos críen les muyeres que nos arrodien". El testu, con un llargor máximu de 280 pallabres, en prose o en versu, tien que tar venceyáu a la muyer y en rellación cola so importancia pal caltenimientu de la llingua asturiana, dende cualesquier perspeutiva, sía reivindicativa o d’apegu.

Les creaciones, que pueden ser tanto n'asturianu como en gallego-asturiano, pueden unviase hasta'l vienres al meudía a la direición de corréu electrónicu info@iniciativapolasturianu.org nun documentu en formatu PDF. El día 20 va dase a conocer el fallu del xuráu, formáu por diferentes personalidaes, asina como por delles collaboradores d'Iniciativa pol Asturianu.

El testu ganador va llevar un llote de llibros n'asturianu, recompensa que tamién va recibir el segundu y tercer premiu. Con esta convocatoria, l'asociación que trabaya pola normalización del idioma quier sumase a les reivindicaciones pol Día Internacional de la Muyer y homenaxar "a toles muyeres que nos arrodien y a les que gracies a elles deprendimos asturianu".