El Premiu Yolanda Huergo naz pa emburriar la normalización del idioma ampliando les temátiques nes que s’emplega

L’asociación cultural Grana n’alcordanza de Yolanda Huergo convoca la primer edición del premiu que lleva’l nome de l’activista y política asturianista. Ésti, con una recompensa de 1.500 euros, naz pa emburriar la normalización de la llingua asturiana animando a la investigación de cualquier temática o llinia d’estudiu nesti idioma.

La creación del Premiu Yolanda Huergo pa trabayos d'investigación n'astrurianu foi ún de los primeros oxetivos que se marcó esti coleutivu formáu por collacios y compañeros de la xixonesa pa caltener la so memoria creando un espaciu d’alcuentru y debate al traviés de la organización de xornaes, meses redondes, charres y toles formes posibles d’intercambiu d’idees y propuestes pa qu’haya conocencia sobre cualquier tema que pueda ser relevante pa la sociedá asturiana y el mundu. Asina entamó en payares l’actividá ‘(Sobre)vivir n’Asturies. Presente y futuru del territoriu y la so población’, qu’axuntó per dos díes nel Centru de Cultura Antiguu Institutu a dellos espertos sobre la cuestión con bona respuesta de públicu.

Agora llega la convocatoria de la primer edición d’esti gallardón pa reconocer trabayos d’investigación fechos n’asturianu de cualquier temática o llinia d’estudiu“coles mires d'animar a la investigación” y “emburriar la normalización de la llingua asturiana ampliando más los trabayos y les temátiques creaos o traducíos a esta llingua”. El premiu cuenta con una dotación de 1.500 euros, amás de la espublización del escritu, y va entregase na seronda.

El plazu pa presentar los artículos, qu’han tener una estensión mínima de 100 páxines, ye’l 1 de xunetu. Éstos han unviase na direición de corréu electrónicu info@asociaciongrana.com.

Un xuráu, conformáu por un representante de Grana, dos persones escoyíes pola asociación “pola so solvencia investigadora y valir académicu” y un delegáu de la editorial, amás de Pablo Rodríguez, ensin votu, como secretariu, va valorar la orixinalidá académica, la calidá metodolóxica de la investigación y la so relevancia científica y social, a la hora d’escoyer el trabayu merecedor de la recompensa. La xente interesao pue consultar equí les bases del I Premiu Yolanda Huergo.

Na semeya, un momentu de la mesa redonda 'Visiones d’Asturies' de les primeres xornaes de Grana, na que participaron Ignaciu Llope, Mariana Borissova Boneva, Arantza Margolles (moderadora), Manuel Maurín y Francisco José Llera Ramo.