Aína apuesta por nun presentase’l 28-M y siguir col “trabayu sele, posáu, responsable y maduru” p’asturianizar la política

“Mui ilusionaos y con ganes de siguir faciendo coses”. Asina salieron los afiliaos d’Aína que participaron na I Asamblea Nacional del partíu, que decidió nun acudir a les eleiciones del 28 de mayu pa siguir col “trabayu sele, posáu, responsable y maduru” d’estos meses col enfotu d’asturianizar la política asturiana.

Con una alta presencia del cuasi centenar de persones inscrites nel procesu que dieron el pasu d’afiliase desendolcóse l’actu col qu’Aína nacía de fechu como partíu. Una cita mui esperada que tuvo llugar el sábadu na Casa Cultura de Llanera, en Llugo, na que la mirada esterior taba puesta sobre manera na postura que diba tomar la formación no que respeuta a les eleiciones nacionales y conceyiles convocaes en mayu.

Finalmente votáronse dos opciones, presentase o nun presentase, anque nel documentu presentáu pola Mesa Nacional provisional con una argumentación coles debilidaes, amenaces, fortaleces y oportunidaes de caúna valorábense trés. Con una amplísima mayoría, cuasi unanimidá, decidióse la opción del ‘non’, polo que nun s’entró na de dir en solitariu (a les nacionales y conceyos onde sía posible; a les nacionales; o namái nos conceyos onde sía posible) o na de participar d’otres candidatures o avalales dende fuera.

La postura mayoritaria dientro de la Mesa Nacional provisional yera nun presentase, pero hebo un alderique ampliu previu “nun ambiente de máximu respetu y empatía hacia les diferentes opiniones”. “Valoróse que somos un partíu mui mozu, nel que tamos conociéndonos los propios miembros de la Mesa Nacional, que tamos faciendo un trabayu sele, posáu, responsable y maduru nesti tiempu, y que nun yera preceutivo quemanos nunes eleiciones ensin consolidar esi trabayu”, apunten dende la Executiva, qu’al terminar l’Asamblea rescamplaba’l determín tomáu pa “siguir asturianizando la política, construyendo y medrando pa facer d'Asturies el país que merecen les asturianes y los asturianos”.

Asina, siguiendo’l mandáu del Congresu Fundacional, la Executiva y la Mesa Nacional de la que forma parte van ellaborar, llueu d’un análisis fondu de la política asturiana, un programa políticu que sirva de base pa trabayar estos 4 años.

Plan Feminista y pasos próximos

La I Asamblea Nacional d’Aína arrancó cola presentación del Plan Feminista #EnsinNosostresNunHaiCamín, “una serie d’actuaciones pa estimular la participación de muyeres” na formación, algamando “cuotes d’igualdad plena y que ésti sía un partíu feminista, transinclusivu, respetuosu cola diversidá funcional, étnica, l’adscripción de xéneru y la orientación sexual”. Ente elles, la realización d’estudiu a partir d’encuestes a muyeres “sobre los motivos y dificultaes a la hora de participar y esponese” o un protocolu contra les agresiones machistes o la conciliación.

Aprobáronse darréu la memoria del trabayu fechu estos trés meses previos pola Mesa Nacional provisional y les propuestes de les Estayes de Trabayu, estructurales y sectoriales, coles qu’Aína “quier animar a la participación de l’afiliación en distintos temes y afondar nel so programa políticu”, nes qu’a última hora fíxose una modificación de nome nuna concreta pa torgar confusiones. Tamién hebo consensu en validar les candidatures presentaes pa la Executiva, la Mesa Nacional y la Comisión de Control y Garantíes Democrátiques.

El xueves va celebrase’l primer conceyu de la Mesa Nacional, formada polos 13 miembros de la Executiva y les 8 persones escoyíes na Asamblea. Los pasos próximos son “terminar el procesu de llegalización, siguir consolidando l’afiliación, siguir conformando les agrupaciones llocales, y siguir desendolcando’l Plan Feminista y el programa políticu”.

Tamién va tratase qué persones van conformar el Secretariáu del partíu. De calter rotatoriu, va tar formáu por cuatro miembros de la Executiva que van facer el llabor de voceros, ensin más poder que’l restu de compañeros.

“La valoración que podemos facer ye en positivo. La xente salió mui ilusionao y con ganes de facer coses. Ve trabayu y ta satisfecho de la imaxe”, apunten denden la Executiva, que tamién rescampla “el consensu en tolos asuntos y la coincidencia d’idees ente los participantes”.

Na semeya, la Mesa Nacional d'Aína escoyida na I Asamblea Nacional.