La I Asamblea Nacional d’Aína llega con una candidatura única y “munchu enfotu”

Esti sábadu va nacer formalmente Aína, que se presenta como un partíu “asturianista d’izquierda modernu, útil, atractivu y integrador”. Depués del Congresu Fundacional de payares y de dar tolos pasos necesarios pa la so llegalización celebra agora “con munchu enfotu” la I Asamblea Nacional, nel que los afiliaos van dar el preste a la candidatura única a la Executiva y van decidir el posicionamientu de cara a les eleiciones del 28-M.

A les 9.30 hores tán convocaos na Casa la Cultura de Llanera, en Llugo, pa un eventu que, baxo’l títulu de #HaiQueTenerEnfotu, va contar con un orde del día de 7 puntos. El primeru va ser la presentación del Plan Feminista #EnsinNosostresNunHaiCamín, que se desendolcó al notar “que la participación taba mui masculinizada, dalgo que nos esmolez muncho. Aína ye una organización feminista que nun quier selo sólo en teoría, sinón tamién na práutica”, apunten dende la Mesa Nacional Provisional, nomada nel Congresu Fundacional y formada por 19 persones que s’encargaron d’organizar tol procesu hasta la cita de mañana, nel que va disolvese.

Darréu va presentase la llectura de la Memoria de la Mesa Nacional Provisional y l’aprobación, si procede, de la so xestión, y la propuesta d’estayes de trabayu estructurales y sectoriales, pa siguir cola decisión del posicionamientu pa les eleiciones nacionales y conceyiles del 28 de mayu. La organización presentó un documentu nel qu’analicen fondamente les trés posibilidaes esistentes coles sos debilidaes, amenaces, fortaleces y oportunidaes.

En concreto valórase presentase con una candidatura propia (a les nacionales y conceyos onde sía posible; a les nacionales; o namái nos conceyos onde sía posible), nun acudir a les urnes o participar d’otres candidatures o avalales dende fuera. Decida lo que se decida, yá ta afitáu dende’l Congresu Fundacional la ellaboración d’un programa políticu que va servir de base al trabayu de la formación pa estos cuatro años vinientes.

Camín alantre

Los trés últimos puntos del orde del día son la escoyeta de la Executiva del partíu, órganu encargáu de dirixir el día a día de la organización; de la Mesa Nacional, col encargu de controlar y asesorar l’aición de la Executiva; y de la Comisión de Control y Garantíes Democrátiques, órganu qu’ha mirar pol respetu de los derechos y dignidá de les persones afiliaes. En total presentáronse 26 persones a los cargos, polo que de fechu esiste una candidatura única que los afiliaos deberán validar.

La de la Executiva, que va tar formada por 13 persones, y lleva’l nome de ‘Camín alantre’ cola participación de Isabel Álvarez, Xicu Ariza, María Fernández, Silvia Fernández, Nuria García, Iyán González, Esteban González, Elena Gutiérrez, Lluis Aíque Iglesias, Ástor Llaneza, Pelayo Martínez, Lina Kythera Menéndez y Marcos Rodríguez. D’ente ellos van salir cuatro persones que van formar el Secretariáu y van facer el llabor de voceros, ensin más poder que’l restu de compañeros.

Tolos miembros de la Executiva van participar tamién na Mesa Nacional, que va contar con 21 componentes. Ocho persones presentáronse pa ocupar les 8 places restantes: Sergio Alejandro, Ignacio de Barrutell, Aida Celemín, Lluques Díaz, Óliver González, Claudia González, Rubén Iglesias y Aarón Moráis.

Pele so parte, la Comisión de Control y Garantíes Democrátiques va disponer de cinco integrantes. Irene Faza, Raúl García, Natalia González, Rodrigo Suárez y Iñaki Vergara son los candidatos.

Media d’edá de 35 años

A les 13 hores ta previsto que fine la I Asamblea Nacional d’Aína, a la que se llega “con munchu enfotu” depués d’un procesu de 3 meses nes que se crearon les agrupaciones llocales d’El Nalón, Xixón, l'Oriente, El Caudal, Avilés y contorna, Uviéu y El Nora, representando a 30 conceyos, amás de celebrar un conceyu con xente emigrao. “Tamos viendo qu’hai mui bona respuesta, ganes, ilusión y estratexa”, rellaten dende la Mesa Nacional Provicional, que cifra en cuasi 200 persones les que tán participando n’Aína sumando afiliaos –hasta medianueche ye posible dase d’alta y participar mañana con votu– y inscritos.

Cola única esmolición de la poca presencia femenina que se va tratar d’iguar aplicando’l Plan Feminista enantes mencionáu, valórase enforma “contar con bastante xente, xente mui mozu que dexa la media de l’afiliación nunos 35 años, y una montonera d’idees”. Idees que se van poner en práutica dende mañana, cuando va tener llugar el nacimientu real d’esti partiu “asturianista d’izquierda modernu, útil, atractivu y integrador”.

Na semeya, un momentu del Congresu Fundacional d'Aína celebráu en payares en Les Vegues.