Convócase'l Premiu al Pueblu Exemplar d'Asturies del 2023

La Fundación Princesa de Asturias asoleya'l reglamentu del gallardón que ganó Cadavéu nel 2022 n'asturianu, gallego-asturiano y castellanu.

Yá ta abiertu'l plazu de presentación de candidatures al XXXIV Premiu al Pueblu Exemplar d'Asturies, correspondiente al añu 2023. El 13 de xunetu a les 14 hores fina'l plazu pa qu'instituciones, centros culturales, asociaciones de vecinos, entidaes y empreses, asina como ciudadanos a títulu particular, puedan facer les sos propuestes.

Esti gallardón busca reconocer al "pueblu, aldea, nucleu de población, espaciu paisaxísticu o grupu humanu del Principáu d'Asturies que rescamplara de mou notable na defensa y conservación del so entornu natural, ambiental, del so patrimoniu históricu, cultural o artísticu, n'iniciatives d'impulsu económicu y social o na realización d'obras comunales o otres manifestaciones de solidaridá sobresalientes”. L'añu pasáu'l xuráu tuvo qu'escoyer ente 29 opciones, resultando merecedor del reconocimientu Cadavéu, parroquia que recibió los 25.000 euros del premiu.

Respetu a la toponimia

Dos aspeutos tan carauterizando nos años últimos el Premiu al Pueblu Exemplar. El primeru ye la espublización del reglamentu nes trés llingües falaes nel país y la segunda, el respetu a la toponimia tradicional, oficial en 74 de los 78 conceyos asturianos.

Asina, l'añu pasáu la Fundación Princesa emplegó en tou momentu l'oficial Cadavéu, anque'l derogáu 'Cadavedo' se pudiera sentir en dalguna ocasión por parte de les autoridaes na visita de los reis d'España, la princesa y la infanta al llugar. Cosa diferente foi'l proceder de dalgunos medios de comunicación, especialmente los asturianos, qu'avecen a non cumplir la llegalidá toponímica.

Na imaxe, gráficu de la Fundación Princesa de Asturias colos 33 gallardonaos col Premiu al Pueblu Exemplar.